Муус устар 19 күнүгэр киин куорат баһылыга Евгений Григорьев 31№-дээх оскуола үрдүкү кылааһын үөрэнээччилэригэр обществознание аһаҕас уруогун ыытта. Мээр кылаас чааһын муус устар 21-гэр буолаары турар Олохтоох бэйэни салайыныы күнүгэр туһулаата.
Евгений Григорьев оҕолорго Дьокуускай куорат холобуругар судургу уонна тиийимтиэ тылынан олохтоох бэйэни салайыныы диэн тугун, туох боломуочуйалар баалларын, чуолаан, куорат баһылыга онно туох суолталааҕын быһаарда. Уруок устунан истиҥ кэпсэтиигэ кубулуйда. Үөрэнээччилэр баһылыктан оскуолатааҕы кэмнэрин, оскуоланы бүтэрэр баала хайдах ааспытын сэҥээрэн ыйыттылар. Ону сэргэ оҕолортон куорат ситимин толору хааччыйыыга, оптуобус пааркатын саҥардыыга, социальнай ситимнэри туһаныыга сыһыаннаах ыйытыылар киирдилэр.
«Оскуоланы бүтэрдэххитинэ, эһиги иннигитигэр элбэх суол арыллыа. Ону таларгытыгар сүрүнэ бэйэҕит күүскүтүгэр эрэниҥ, ситиһиилээх буолуу төрдө барыта бэйэҕитигэр баарын итэҕэйиҥ. Уонна ситиһии сүрүн кистэлэҥэ туруорбут сыалга күүстээх дьулуһууга, кытаанах дьиссипилиинэҕэ сытарын өйдөөҥ», - диэн Евгений Григорьев оҕолорго сүбэлээтэ.
Сонун төрдө: Дьокуускай к. Уокуругун дьаһалтатын пресс-сулууспата
