Киир

Киир

Саха АССР 100 сылын чэрчитинэн ыччат дьарыктаах буолуутун декадатын программатынан, «Траектория карьеры» үлэ миэстэтин онлайн-дьаарбаҥката саҕаланна.

Бу бырайыак 27 тэрээһиннээх буолуо. Ол курдук, Саха сиригэр идэлээх буолуу туһунан маастар-кылаастар, сэминээрдэр уонна тириэниннэр ыытыллыахтара. «Траектория карьеры» бырагыраамма кыттааччылара өрөспүүбүлүкэҕэ үлэ ырыынага хайдаҕын эрэ туһунан буолбакка, урбаан үлэтин туһунан сүрүн сырдатыылары билиэхтэрэ.

«ЯрмаркаВакансийЯкутии.рф» портал сигэтинэн киирэн, эрэгэстэрээссийэни ааһан баран, бу дьаарбаҥкаҕа кыттыыны ылыахха сөп. Маныаха, тэрийээччилэр тэрээһин онлайн-былаһааккаларыгар киирэргэ анал сигэлэри ыыталлар.

ярмарка 7

«Саха сиригэр 35% актыыбынай нэһилиэнньэ – эдэр ыччат. Онон, каадырдары бэлэмнээһин боппуруоһа, эдэр испэсэлиистэр бэйэлэрин көрдөрүүлэрэ, кинилэр үлэни булуулара куруутун өрөспүүбүлүкэҕэ болҕомто киинигэр сылдьар», - диэн Саха Өрөспүүбүлүкэтин Дьарыктаах буолуутун Судаарыстыбаннай кэмитиэтин бэрэссэдээтэлэ Елена Калашникова идэ дьаарбаҥкатын арыллыытыгар эттэ.

Кини бэлиэтээбитинэн, «Траектория карьеры» бу сылга Саха АССР төрүттэммитэ 100 сылыгар анаммыт эдэр ыччат дьарыктаах буолуутун бырагыраамматын декадатыгар киирсэр.

ярмарка 3

«Биһиги бу дьаарбаҥканан ааспыт нэдиэлэҕэ саҕалаабыт эдэр ыччат дьарыктаах буолуутун декадатын түмүктүүбүт. Үс күн устата бөлөхтөрүнэн арахсан аҕыс оройуону хаптыбыт. «Бырамыысаланнаска олохтоох каадырдар» диэн бырагыраамманан 500 киһини хаптыбыт. «Профессионалы Якутии» диэн форум ыыттыбыт. <…> «Траектория карьеры» дьаарбаҥка үлэ көрдүүр эдэр ыччаты эрэ буолбакка, өрөспүүбүлүкэ сайдыытыгар тус интэриэстээх Саха сирин эдэр олохтоохторун мунньуо диэн эрэнэбит», ㅡ диэн Дьарыктаах буолуу Судаарыстыбаннай кэмитиэтин бэрэссэдээтэлин солбуйааччы Савва Михайлов тыл эттэ.

ярмарка 5

Маны таһынан, дьаарбаҥка арыллыытыгар «Арассыыйатааҕы устудьуон этэрээттэрэ» бүтүн Арассыыйатааҕы уопсастыбаннай тэрилтэ Саха сиринээҕи салаатын эрэгийиэннээҕи ыстаабын салайааччыта  Айсен Соловьев тыл эттэ. Кини өрөспүүбүлүкэҕэ тутуу этэрээттэрэ хайдах үлэлии-хамныы сылдьалларын туһунан сырдатта:

«Бүгүҥҥү күннээххэ, өрөспүүбүлүкэ эдэр ыччатын министиэристибэтэ өйөбүлүнэн, биһиги сыл ахсын 1,5-2 тыһ. устудьуону хабатыт. Номнуо, бу сылга Саха сирин Ил Дархана 2,5 тыһ. устудьуону үлэҕэ киллэрии туһунан сорук туруорбута», - диэн эттэ.

ярмарка 6

Ил Түмэн бастайааннай кэмитиэтин бэрэссэдээтэлэ Владимир Чичигинаров эппитинэн, дойду уонна Саха сирин былаастара саҥа ирдэбиллэргэ эппиэттэһэн, үлэ ырыынагын сайдыытын тэтимин улаатыннараллар. Маныаха, бырабыыталыстыба өйөбүл саҥа миэрэлэрин киллэрэр:

«Хамсык, уопсайынан, үлэ ырыынагар соччото суохтук сабыдыаллаата. Аны бу сылга биһиги дойдубут утары сааҥсыйалар күүһүрэ тураллар. Бу дьайыылар социальнай, экономическай балаһыанньабытыгар дьайбаттарын туһугар, Арассыыйа бэрэсидьиэнэ Владимир Путин сааҥсыйа утары чопчу миэрэлэри ылла. Биһиги өрөспүүбүлүкэбитигэр Ил Дархан эмиэ наадалаах миэрэлэри ылла, ол быыһыгар үлэ ырыынагын балаһыанньата тупсарыгар эмиэ. Маныаха, бастатан туран, социальнай хантараак бырагыраамматын үбүлээһини үрдэтии, «Бырамыысаланнаска олохтоох каадырдар» бырагыраамманы кэҥэтии уонна тус хаһаайыстыбалары өйөөһүн».

«Траектория карьеры» үлэ миэстэтин онлайн-дьаарбаҥката Уһук Илин уонна Арктика сайдыытын Корпорацията өйөбүллээх Саха Өрөспүүбүлүкэтин Дьарыктаах буолуутун Судаарыстыбаннай кэмитиэтэ үһүс төгүлүн ыытар. Бырайыак ыытыллар кэмигэр дьаарбаҥка Саха сирин 10 тыһ. кэриҥэ эдэр ыччатын хапта. Маны сэргэ, өрөспүүбүлүкэ улахан хампаанньаларын кытта үлэни көрдүүр дьон-сэргэ тэҥҥэ дьайсыыларын олохтоон биэрдэ. Бу былаһаакка олохтоох каадырдары үлэҕэ ылыыны систиэмэлээн биэрдэ уонна эдэр ыччат эрэгийиэн улахан тэрилтэлэрин кытта сибээс олохтуулларыгар тирэх буолла.

Денис Попов хаартыскалара туһанылыннылар

Тарҕат:

Санааҕын суруй