Киир

Киир

Өрөспүүбүлүкэ 100 сыллаах үбүлүөйүн көрсө, Дьокуускай куоракка Хомсомуол болуоссатыгар 100 сабыс-саҥа, бары өттүнэн аныгылыы тупсаҕай, кэндиссийэниэрдээх, доруобуйаларыгар хааччахтаах дьону тиэйэргэ анал өҥөлөөх, кыһыл өҥнөөх мааны оптуобустар кэчигирэстилэр.

«Саха АССР төрүттэммитэ 100 сылыгар 100 оптуобус» бырайыак олоххо киириитин чэрчитинэн, муус устар 25 күнүгэр, куораттааҕы, куорат таһынааҕы уонна муниципальнай тэриллиилэр икки ардыларынааҕы морсурууттарынан айанныахтаах саҥа оптуобустары илдьэ сылдьааччыларга күлүүстэри туттартааһын үөрүүлээх түгэнэ буолла. Манна Дьокуускай куорат Дууматын бэрэссэдээтэлэ Альберт Семенов кыттыыны ылла.

Оптуоубс .3

Саха Өрөспүүбүлүкэтин Ил Дархана Айсен Николаев үбүлүөйдээх сылынан эҕэрдэлээн туран, үтүө бырайыагы олоххо киллэрбиттэрин иһин Арассыыйа Федерациятын Бырамыысаланнаска уонна атыыга Министиэристибэтигэр, миниистиргэ Денис Мантуровка махталын биллэрдэ.

«Ааспыт сылга, Илиннээҕи экономическэй форумҥа Дьокуускай куорат уопсастыбаннай тырааныспарын саҥардыы туһунан дуогабар олохтоммута. Федеральнай бүддьүөттэн айылҕа гааһынан барар оптуобустары оҥоруу субсидиятыгар 193 мөл. солкуобай, оттон өрөспүүбүлүкэ киэниттэн маҥнайгы лизинговай төлөбүрү оҥорууга 120 мөл. солк. көрүллүбүтэ.

Бу суолбут саҕаланыытынан буолар, бу сылга Дьокуускай куоракка тырааныспар сырыытын саҥа систиэмэтэ киириэҕэ, биир кэлим билиэттэр таҥыллыахтара уонна саҥа морсурууттар үөдүйүөхтэрэ диэн эрэнэбин. Сотору кэминэн, Бэрдьигэстээх, Нам сэлиэнньэлэрин, Покровскай куорат уонна Мохсоҕоллоох бөһүөлэгин олохтоохторо саҥа оптуобустарынан айанныахтара», - диэн Айсен Николаев этэр.

Оптуобус 2

«Якутская пассажирская автотранспортная компания» МУП дириэктэригэр Валерий Домотовка уонна «Союз автоперевозчиков города Якутска» кэммиэрчэскэйэ суох тэрилтэ дириэктэригэр Андрей Косицкайга 35-тии саҥа оптуобустар күлүүстэрин, маны таһынан, «Якутская пассажирская автотранспортная компания» сүрүн инженеригэр Спартак Шульгиҥҥа 30 күлүүс туттарылынна.

Оптуобус 1

Дьокуускай куорат баһылыга Евгений Григорьев бэлиэтээбитинэн, саҥа 100 оптуобус ыам ыйыгар куораттааҕы, куорат таһынааҕы уонна муниципальнай тэриллиилэр икки ардыларынааҕы морсурууттарынан сүүрэ тахсыахтара.

«Айсен Николаев өйөбүлэ суох бу бырайыак олоххо киириэ суоҕа эбит. Дьокуускай куорат Дууматын дьокуутаттарын хамаандаларын кытта бүддьүөтү ылыммыппыт уонна бу кэлэр 6 ый тухары оптуобустарга лизинговай төлөбүр оҥоһуллуо. Ыам ыйыгар, өрөспүүбүлүкэ 100 сылын чэрчитинэн 100 нүөмэрдээх морсуруут үлэҕэ киириэҕэ. Биһиги бу бырагыраамманы салҕыахпытын баҕарабыт, саҥардыы комплекснай исхиэмэтинэн үлэлиибит. Ааспыт сылтан биир кэлим истииллээх сылаас тохтобуллары тутабыт», - диэн Евгений Григорьев бэлиэтиир.

Бу күн куорат олохтоохторо уонна ыалдьыттара сабыс-саҥа оптуобустар тастарыгар үөрэ-көтө хаартыскаҕа түстүлэр.

Дьокуускай куорат Дууматын пресс-сулууспатын матырыйалыттан

Тарҕат:

Санааҕын суруй