Бүгүн, муус устар 27 күнүгэр, Саха АССР төрүттэммитэ 100 сылын көрсө, 14.00 чаастан өрөспүүбүлүкэ күнүгэр аналлаах үөрүүлээх хаамыы буолла. Өрөспүүбүлүкэбит улуустарын бэрэстэбиитэллэрэ, куораппыт тэрилтэлэрэ, үөрэх кыһалара, ыччат түмсүүлэрэ, уопсастыбанньыктар бөлөхтөрө уо.д.а. буолан Дьокуускайбыт Киров уулуссатынан, Ленин болуоссатыттан Комсомольскай болуоссакка диэри хаамтылар.
Дьон-сэргэ бука бары үөрбүт-көппүт, сүргэтэ көтөҕүллүбүт. Быыһыгар саха, хотугу-аҕыйах ахсааннаах омуктар, нуучча уонна даҕаны атын омук таҥаһын-сабын таҥныбыттар бааллар. Үөрүүлээх дьоһун күнү эбии мэктиэлээбиттии сааскы чаҕыл күммүт сандаарыччы тыган, үөдүйбүт үтүө үгэни өссө эбии киэргэппиккэ дылы буолла. Хаамыыга кыттааччылар үгүстэрэ муусука доҕуһуоллаахтар, эбиитин хоһоону уонна бэргэн этиилэри доргуччу аахтылар, алгыстаах тыллар эмиэ этилиннилэр, элбэх сиртэн өрөспүүбүлүкэ күнүн уруйдуур-айхаллыыр тыллар иһилиннилэр.
Эһиги болҕомтоҕутугар Саха АССР төрүттэммитэ 100 сылыгар аналлаах үөрүүлээх хаамыыттан быһа тардан хаартыскалар.
Ираида Коркина-Чугдаара хаартыскаҕа түһэриилэрэ
