Сыл ахсын муус устар 27 күнүгэр Дьокуускайга, Өрөспүүбүлүкэ күнүн бэлиэтээһин тосхолунан үөрүүлээх-быһыыга майгыга, саха чулуу дьонун мэҥэ таастарыгар салайааччылар уонна сүгүрүйээччилэр сибэкки дьөрбөтүн уураллар. Быйылгы үбүлүөйдээх тэрээһиҥҥэ Саха АССР төрүттээччилэртэн биирдэстэрэ Исидор Никифорович Барахов мэҥэ тааһыгар элбэх эдэр да, эмэн да дьон муһунна. Үгэс быһыытынан, улахан салайааччылар, Үөһээ Бүлүүттэн төрүттээх дьокутааттар, биир дойдулаахтар уруй-айхал, махтал тылларын эттилэр.
Саха Өрөспүүбүлүкэтин Бырабыыталыстыбатын уонна Ил Дарханын дьаһалтатын салайааччыта Георгий МИХАЙЛОВ бырааһынньыгынан эҕэрдэлээтэ уонна ыччакка анаан Исидор Барахов өрөспүүбүлүкэ төрүттэниитигэр суолтатын, ыччат маннык чулуу дьону билэн улаатарыгар аҕа көлүөнэ кыһаллыахтааҕын, үйэтитии үлэтэ күннэтэ бара туруохтааҕын тоһоҕолоото.
РФ Судаарыстыбаннай Дууматын дьокутаата Федот ТУМУСОВ Исидор Никифорович Барахов аҕалсыбыт автономиятын туһунан: "Сахабыт сирэ, судаарыстыбаннастаах буолан, сайдыы суолугар киирбитэ. Ааспыт үйэ атааннаах-мөҥүөннээх 20-с сылларыгар араас кыһыллар да, үрүҥнэр да бааллара. Ол эрээри кинилэр бары биир санаалаах охсуспуттара - Сахабыт сирэ судаарыстыбаннастаах буолуохтаах диэн. Онуоха саха чулуу уолаттара Былатыан Ойуунускай, Махсыым Оммуоһап, Исиидэр Бараахап уонна да атыттар, оччотооҕу былааһы кытта сөпкө алтыһаннар, Саха сиригэр автономияны аҕалбыттара. Кинилэр үтүөлэринэн, судаарыстыбаннастаах буоламмыт, араас уустук кэмнэри этэҥҥэ туораабыппыт. Кэлэр да кэмнэргэ оннук буолуоҕа диэн эрэнэбин", - диэн бигэтик эттэ.
СӨ Ил Түмэнин наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия ГАБЫШЕВА устуоруктар, дуоһунастаах салайааччылар, кыраайы үөрэтээччилэр уонна биир дойдулаахтар үтүөлэринэн, Исидор Барахов аатын үйэтитиигэ улахан үлэ барбытын бэлиэтээтэ. Кини муус устар 26 күнүгэр өрөспүүбүлүкэни төрүттэспит чулуу киһи дойдутугар, Үөһээ Бүлүү улууһун Харбалаах нэһилиэгэр, Дьокуускайтан тиийбит дэлэгээссийэ уонна олохтоохтор кыттыылаах улахан миитин буолбутун кэпсээтэ.
Тыл этиилэр кэннэ тэрээһин кыттыылаахтара хаһааҥҥытааҕар да элбэх сибэкки дьөрбөтүн уурдулар, үөрэн-көтөн хаартыскаҕа түстүлэр.
Манна даҕатан эттэххэ, СӨ Ил Дархана Айсен Николаев Ыйааҕынан, быйылгы Исидор Барахов үрдүк аатын сүгэр Судаарыстыбаннай бириэмийэни СӨ норуот хаһаайыстыбатын үтүөлээх үлэһитигэр, РФ үтүөлээх экэнэмииһигэр Туйаара Афанасьевна Торговкинаҕа анаатылар.
Тэрээһиҥҥэ сырытта, хаартыскаларга түһэрдэ Күндэли