Бэҕэһээ, Дьокуускай куорат Комсомольскай болуоссатыгар, киэһэ 17.00 чаастан Саха АССР төрүттэммитэ 100 сылыгар аналлаах Cүр көтөҕүү Оһуохайын дьоро тэрээһинэ буолла. Манна эрдэ биллэриллибитинэн, саха эр дьоно түмсэн оһуохайдыахтаахтар диэн этэ. Ол эрээри, бу күн сорох кэрэ аҥаардар тилэх баттаһан, хаалсыбакка оһуохайдастылар. Мин даҕаны сүрбүн көтөҕөөрү, үйэҕэ биирдэ буолар өрөспүүбүлүкэбит төрүттэммитэ 100 сылын бэлиэтиир дьоро күнүн мүччү туппакка, туораттан кэтээн көрдүм. Дьэ, хайдах быһыылаах-майгылаах ыытыллыбыт тэрээһин буолан биэрдэй?
Бастаан тиийбиппэр, Комсомольскай болуоссакка ыы-быччары дьон бөҕө тоҕуоруһа мустубут. Аҕам саастаахтар бэйэлэрэ туспа оһуохайдыы сылдьаллар эбит. Онтон, "Тыгын Дархан" киинэҕэ сүрүн оруолунан аатырбыт Ньургун Бэчигэн дорҕоонноохтук саҥаран-иҥэрэн, үөрүүлээх түһүлгэ саҕаламмытын туһунан биллэрдэ. Дьэ, тута оһуохай буолара буолуо дии санаан, бары кэтэһэн, бэл, иһийэн турдубут. Ол эрээри, дьоммутун-сэргэбитин бэлэмнээн, бастаан биллиилээх артыыстар толорууларыгар сахалыы дьоһун ырыалар дьиэрэйдилэр, ити кэнниттэн, күпсүүргэ оонньуур уолаттар бөлөхтөрө төрүт дорҕоону таһаарда.
Маныаха, матыыптыын даҕаны оһуохайга майгынныыр ырыалар буоланнар, дьон-сэргэ илии-илиилэриттэн ылсан, сүр көтөҕүү дьиҥнээх оһуохайын кэтэспэккэ, төрүт үҥкүүгэ турунан, хамсанан, хаамсан барда.
Салгыы, Дьокуускай куораппыт аҕа баһылыга Евгений Григорьев, Арассыыйа бэрэсидьиэнигэр СӨ бастайааннай бэрэстэбиитэлэ, СӨ Бырабыыталыстыбатын бэрэссэдээтэлин бастакы солбуйааччы Андрей Федотов, СӨ Ил Дарханын Дьаһалтатын уонна Бырабыыталыстыбатын салайааччыта Георгий Михайлов эҕэрдэ тылларын эттилэр.
Бу кэнниттэн, аатырбыт алгысчыт, сахалыы дэгэрэҥ ырыалары толорооччу, саха норуота таптыыр ырыаһыта Битээлий Очиров аал уот оттон алгыс эттэ.
Онтон бары сөбүлээн истэр толорооччубут Лэгэнтэй Сүр Оһуохайыгар киирии тылларын дорҕонноохтук аахта, барыбытын турукка киллэрэргэ дылы гынна уонна Сүр көтөҕүү Оһуохайын саҕалаата. Кини кэнниттэн Битээлий Очиров оһуохай тылларын таһаарда.
Болуоссакка мустубут эр дьон бука бары кэриэтэ тоҥолохторуттан ылсыһан, илиилэриттэн сиэттиһэн, огуй-дугун үктэнэн оһуохайы оройуттан, эһиэкэйи эҥээриттэн ыллылар. Битээлий Очиров оһуохайы түмүктүүрүн саҕана, үрүҥ күммүт баар дьону алҕаабыттыы, сандаарыччы тыган кэллэ.
Эһиги болҕомтоҕутугар Сүр көтөҕүү Оһуохайын дьоро түһүлгэтиттэн түгэннэр.
Битээлий Очиров оһуохайы түмүктүүрүн саҕана, үрүҥ күммүт баар дьону алҕаабыттыы, сандаарыччы тыган кэллэ...
Сүр көтөҕүү Оһуохайын туһунан сырдатта уонна хаартыскаҕа түһэртээтэ Ираида Коркина-Чугдаара
