Муус устар 27 күнүгэр, Саха АССР сүүс сылын туолуутун уонна Өрөспүүбүлүкэбит Күнүн өрөгөйүн үөрүүлээхтик бэлиэтээри, тыһыынчанан дьон Мииринэй куорат Ленин болуоссатыгар муһунна. Саха дьонун дуорааннаах оhуохайа ыраахха диэри эҥээрийдэ.
Бастаан утаа, болуоссакка олус элбэх киһи кэлбит уонна сорох дьон оһуохайдааһын хаамыытын билбэт буоланнар, эргимтэ ыһыллаҕас соҕус этэ. Дьэ, ону сахалар сүбэлээн, үөрэтэн-такайан, дьон илии илиилэриттэн ылсан, хайдах эргийэллэрин быһааран биэрдилэр. Мииринэйгэ, Ленин болуоссатыгар хаһан да бачча элбэх киһи оһуохайдаабатаҕа! Тыһыынчанан киһи добун оһуохайга кэрэтик үҥкүүлээн тэйдэ.
Ону туһугар рекорд да диэххэ сөп. Оhуохайдьыттар нууралдьыйа дугунан хаамтылар, дэгэрэҥҥэ ойуолаан тэлээрдилэр. Онон, бачча улахан түһүлгэни Мииринэй килбэйэр киинигэр тэрийбит куорат былаастарыгар махтал.
Обугулдьуйбут уостартан оhуохай тыла оhуордана оонньохолоото, куулайбыт куруhу, суhуктуйбут санааны илгэр эрэл кыымын сириэдитэр алгыстаах дорҕооннор сатараатылар. Оhуохай тылын этээччилэр дьүрүскэннэрин сэргэ, Үрдүк Айыыларынан кэрэхсэммит сырдык сылаас иргиэрдэрэ бары мустубут дьоҥҥо тиийбит буолуохтаах .
Бу улууканнаах күн Өрөгөй оһуохайын тылларын эппит Федор Петровка, Василиса Колесоваҕа, Сардаана Григорьеваҕа, Надежда Каҥҥа итии, нохтолоох сүрэхтэрбититтэн махтал!
Биhиги – саха дьоно, ырыа-тойук куттаах дьоммут. Yчүгэй ырыаттан чэччийэр, санаабыт эгдийэр чараас эйгэлээхпит.
Онон, бу, оhуохайдаан дэгэйбит дьон – устудьуоннар, оробуочай кылаас, аастыйбыт баттахтаах кырдьаҕастар быардара манньыйда, сүрэхтэрэ сылаанньыйда. Оһуохай алыптаах дорҕооно, саха норуотун былыргы үгэстэрин, ыччаттарбытыгар быhаччы тириэрдэрэ саарбахтаммат.
Саха былыргы кэрэ үҥкүүтүгэр омук дьоно эмиэ кыттыыны ылбыттара кэрэхсэбиллээх. Чахчытын да кэрэ түгэн, добун үҥкүү буолла.
Станислав Алексеев. Мииринэй куорат. Ааптар хаартыскалара.