Быйыл “Уһук Илин 1000 тиэргэнэ” бырагыраама чэрчитинэн, өрөспүүбүлүкэ 37 нэһилиэнньэлээх пуунугар 124 тиэргэни уонна 37 дьоҕус паарканы саҥардыахтара, тупсарыахтара. Ол иһигэр киин куоракка 75-һи. Ити туһунан СӨ сүрүн архитектора Ирина Алексеева кэпсээтэ. Санаттахха, былырыын 15 эрэ тиэргэни саҥардыбыттара.
“Уһук Илин 1000 тиэргэнэ” бырайыак көмөтүнэн Дьокуускайга 75 тиэргэн саҥалыы оҥоһуллуо. Бу бырагыраамаҕа өрөспүүбүлүкэ 37 нэһилиэнньэлээх пууна эмиэ кыттар. Онон, улуустарга 49 тиэргэн эбии оҥоһуллуоҕа. Ити аҥаардас тиэргэн эрэ буолбатах. Ол иһигэр бөһүөлэк иһинээҕи дьоҕус пааркалары саҥардыы-тутуу эмиэ киирэр. Тоҕо диэтэххэ, кэлин тиэргэни тупсарыы (благоустройство) өйдөбүлэ төрдүттэн уларыйда. Урукку курдук “аспааллаатыбыт, уотун-күөһүн оҥордубут, оҕо былаһааккатын тэрийдибит” диэнинэн муҥурдаммат буоллубут. Аныгы тиэргэн элбэх функциялаах, эдэриттэн-эмэнигэр тиийэ бары табыгастаахтык сынньаналларыгар анаан оҥоһуллубут анал территория буолуохтаах”, – диир хотун Алексеева.
