Ыам ыйын 1 күнүгэр Сахабыт сиригэр үлэлээн иитиллээччилэр күргүөмүнэн хаамыылара буолла. Өрөспүүбүлүкэ үрдүнэн 75 тыһ. тахса киһи, оттон киин куоракка 45 тыһ. кэриҥэ киһи кытынна диэн Ил Дархан Айсен Николаев телеграм-ханаалыгар суруйдулар.
Икки сыл хааччахха олорбут дьон Үлэ уонна саас бырааһынньыгар мустан хаамыыны, түмсүүнү, үөрүүнү-көтүүнү улаханнык суохтаабыттар эбит. Ону кинилэр олус үчүгэйдик тэринэн, бэлэмнэнэн, киэргэнэн тахсыбыттара, Сахабыт сирин бары муннуктарыттан – куораттартан, улуустартан, нэһилиэктэртэн кэлэ турар дьэрэкээн хаартыскалар, видеолар туоһулууллар.
Оттон Дьокуускай ыам ыйын 1 күнүнээҕи хаамыыта уруккуттан аатырыан аатырар. Быйылгы хаамыы Уһук Илин үрдүнэн саамай элбэх кыттааччылаах уонна үчүгэй тэрээһиннээх сөҕүмэр хаамыы аатын сүктэ.
Хаартыска: Владислав Коротов телеграм-ханаалыттан
