Венгрия Арассыыйаттан ньиэп уонна гаас кэлиитин тохтотууну утарар. Бу туһунан дойду премьер-миниистирин канцеляриятын бас киһитэ Гергей Гуйяш Дьобуруопа сойууһа Арассыыйа утары сааҥсыйалары ырытыһыы кэмигэр эппит.
Кини этэринэн, Дьобуруопа сойууһа бэйэтигэр охсуон сөптөөх сааҥсыйалары киллэриитэ табыгаһа суох. Гуйяш биллэрэринэн, Венгрия маннык курдук Дьобуруопа сойууһун көҕүлээһинигэр бэйэтин санаатын этинэр, оттон дойдуларга биир кэлим позиция суох буоллаҕына, тохтотууну киллэрии олоххо киирбэт.
Эниэргийэ ресурстарын тохтотууну утаран, Венгрия бырабыыталыстыбатын официальнай бэрэстэбиитэлэ Золтан Ковач эмиэ санаатын эппит.
«Арассыыйа ньиэбин уонна гааһын тохтотууга Венгрия позицията уларыйбат: биһиги ону өйөөбөппүт», - диэн кини эппитин Reuters эгиэнистибэ тиэрдэр.
Москуба эппит схематынан, тас дойдуттан Арассыыйа гааһын атыылаһааччылар «Газпромбанк» усчуотугар евроны уонна доллары угуохтаахтар, оччоҕо ол төлөбүрдэрэ солкуобайга көһүөхтээх. Венгрия салалтата уонна даҕаны атын Дьобуруопа дойдулара бу схеманы ылыммыттара. Ол эрээри, Болгария уонна Польша эниэргийэ ресурстарын солкуобайынан төлүүрү табыгаһа суоҕунан аахпыттар, онон, ол дойдуларга гааһы аҕалыы тохтообут.
24.hu иһитиннэрэринэн, Украинаҕа байыаннай эппэрээссийэ саҕаламмытын кэнниттэн, Дьобуруопа дойдулара гааһы уонна ньиэби туттуу иһин 45 миллиард евроны Арассыыйаҕа төлөөбүттэр. Арассыыйа Дьобуруопа сойууһун дойдуларыгар 40% гааһынан уонна 26% ньиэбинэн хааччыйар. Онон, бу эниэргийэ ресурстарын тохтотуу түмүгэр экономикабыт улахан охсууну ылыаҕа диэн, сорох дойдулар маннык сааҥсыйаны утараллар.
Ылыллыбыт саайта: rg.ru
