Киир

Киир

Өрөспүүбүлүкэ хоруона хамсыгын утары охсуһар Суһал ыстаабын киинэ иһитиннэриилэригэр сигэннэххэ, Мииринэйгэ муус устар ый устата 388 киһи хоруона хамсыгар хаптарда. Ааспыт ый дьаҥ тарҕаныытыгар инникилэрдээҕэр аматык буолара дьэҥкэтик көстөр. Ол курдук тохсунньуну, олунньуну, кулун тутар ыйдары кытары тэҥнээтэххэ, муус устарга ыалдьыы таһыма быдан оччугуй.

Медики МЦРБ

Бу дьыл тохсунньутугар 565 киһи хоруона хамсыгар ылларбыта. Олунньут устата ковидынан ыалдьыбыт ахсаана – 2.506 киһи этэ, кулун тутар ыйга – 1.375.

Тус бэйэм олунньу ыйыгар иккиһин ковидтаан эмиэ мөлтүү сылдьыбытым. 2020 сыллаахха бастакы ковидынан ыалдьан балыыһаҕа киириибэр, цитокиновай «буурҕаттан» турбат да, олорбот да буолан хаалбытым. Оттон 2022 сыл олунньутугар омикрон хамсыга аны испин-үөспүн буулаабыта. Тахсан киирэр сиртэн быкпат буола сылдьыбытым.

Омикронтан сүрэх, уйулҕа ыарыһахтар, астмалаахтар, бастакы уонна иккис группалаах саахар диабеттаахтар, үрдүк дабылыанньалаахтар уонна бастакы-иккис группа энцефалопатиялаахтар бокуйаллар эбит. Онон, омикрон – хабыр ыарыы.

Аны, стелс-омикрон диэн дьаҥ үөдүйбүтэ балачча кэм буола оҕуста. Аан дойду араас муннуктарынан тилийэ көтөр. Аангылый тылыттан тылбаастаатахха «стелс» – биллибэт-көстүбэт диэн. Сорох бу ыарыынан ыалдьыбыт киһи дьаҥҥа ылларбытын көннөрү тумуу курдук аһарыныан сөп. Ол эрээри, бу дьаҥынан ыалдьыбыт киһи саамай тыын уорганнарын кэбирэтэр. Сүрэҕи, быары-бүөрү, куртаҕы мөлтөтөр уонна үөс таһаарар былчархайдарга дьайар.

Бука диэн, маны учуоттаан туран, хайдах кыалларынан бу амырыын дьаҥтан сэрэниҥ, харыстаныҥ.

Хоруона хамсыга төрүт дьалбарыйбата. Кытайга стелс-омикрон мөлүйүөн киһини ыарытыннарда. Онон, бу диэки ол дьаҥ кэлэн, сириэдийиэн сөп. Сэрэниҥ, харыстаныҥ.

Станислав Алексеев. Мииринэй куората. МЦРБ саайтыттан хаартыска

Тарҕат:

Санааҕын суруй