Кэнники үс сылга отут биэс тыһыынча нэһилиэнньэлээх эрэ Мииринэй куоратыгар аҕыс аптека аһылынна. Дьэ, ыарыһах, аһаахтыйар киһи харчытын тэбиир сирдэрэ. Сыаналара “амырыына” сөхтөрөр.
Харах-көс эмтэриттэн саҕалыахха. Аныгы киһи хараҕа туох аанньа буолаахтыай. Элбэх киһи ачыкыланар. Харах хааппылаларын атыылаһарга күһэллэбит. Манна Мииринэй аптекаларыгар, Дьоппуонньаҕа оҥоһуллубут «Каталин» офтальмологическай харахха кутуллар суурадаһын сыаната – 700-1000-тан тахса солк. Дьокуускайтан бу эми 617 солк. атыылаһыннарбытым.
Финляндия офтальмологическай суурадаһына – «Оффтан Катахром» Мииринэйгэ ортотунан 680 солк. Финскэй эмп Дьокуускай социальнай аптекаларыгар соторутааҥҥа диэри 400 солк. этэ.
«Окувайт» харах-көс үлэтин тупсарар эмп (БАД) Мииринэйгэ 1.230 солк. Сүрдээх сыана.
“Лютеин форте”, «Черника Форте» Мииринэй аптекаларыгар Дьокуускай гиэнинээҕэр быдан ыарахаттар.
“Спазмалогон”(20 таблетка) Мииринэйгэ – 250 солк. Дьокуускайга – 200 солк.
“Но-шпа”(24 ) Мииринэйгэ – 205-276 солк. Дьокуускайга - 119 солк.
“Супрастин”(20) Мииринэйгэ – 159. Дьокуускайга – 132 солк.
“Аквафор” мурун сарыытын сайҕыыр муора уута, Мииринэйгэ, Дьокуускай аптекаларынааҕар балтаараа төгүл ыарахан сыаналаах. Уҥуох-сүһүөх ыарыылаахтарга аналлаах артро-актив 600 солк, маастар сыаналарын этэ да барбаппын. Олус ыарахаттар.
Аны, утуйбакка эрэйдэнэр дьоҥҥо аналлаах эмп Мииринэйгэ сыаната ыарахана сөхтөрөр.
24 таблеткалаах американскай “Мелаксен” Дьокуускайга 694 солк атыыланар буоллаҕына Мииринэйгэ – 1.000 солк. тахса. Саҥа утутар эмтэр, онтулара үгүстэрэ БАД-тар бас быстар сыаналаахтар.
Уйулҕа кэһиллиитин эмтиир “Релаксазон” – 411 солк.
Мииринэйгэ «Арбидол» капсулалаах эмэ – 683, таблеткалааҕа – 470 солк.
Дьэ ити курдук, эмп-томп Мииринэйгэ олус ыарахан сыаналаах.
Станислав Алексеев. Мииринэй куората.