1 351 киһи олорор Алмазнай оробуочай бөһүөлэгин олохтоохторун баанньыктара мөлтөх туруктааҕын туһунан суруйан турабын. Баанньык туругун сиһилии көрдөрөр хаартыскалары суруйуубар кыбытабын.
Ол эрээри, алмазнайдары сэргэх уларыйыылар күүтэллэр.
Салалта мантан кыбыстыахтаах
Бу дьыл тохсунньу 13 күнүттэн саҕалаан ахсынньы 30 күнүгэр диэри саҥа баанньык тутуутун бырайыактыыр-симиэтэлиир докумуонугар (ПСД) тендер биллэриллибитэ. Сакаасчыт – Алмазнай бөһүөлэгин дьаһалтата.
Кырдьык даҕаны, ааспыт үйэ 60-с сылларыттан ылата алмаас хостоон дойдуну балысханнык байыппыт сир, итинник куһаҕан көрүҥнээх баанньыктаах олороро отой сүөргү. Бу баанньыкка алмазнайдар эрэ буолбакка, чугастыы сытар Арыылаах сэлиэнньэтиттэн кэлээччилэр.
Онон, сотору кэминэн самнайбыт, сарымтыбыт тутуу күрдьүллүөҕэ диэн эрэл үөскээтэ.
Станислав Алексеев. Мииринэй куората.
