«Якутскэнерго» тэрилтэ киин элэктэриичэскэй ситимнэрин тэрилтэтигэр, ыам ыйыттан балаҕан ыйыгар диэри ыытыллар субуотунньуктар кэмнэрэ саҕаланна. Хомуйуу, ыраастыыр үлэ нэдиэлэ бээтинсэтин ахсын ыытыллар.
Хас саас аайы, үгэс быһыытынан, Автородорожнай уулусса 26-с дьиэтигэр баар Киин электро-ыстаансыйа тэрилтэтин уонна Энергетиктэр переулоктарын 4-р баар Киин РЭС үлэһиттэрэ тэрилтэлэрин сирин-уотун уонна онтон чугас сытар сир иэнин бөҕүн-саҕын, түспүт сэбирдэҕин, эргэ отун хомуйдулар, аспаал суолу, күрүө таһыгар уонна айан суолун кытыытын бөҕүн ыраастаатылар.
Хаар ууллубутун уонна сир кырса куурбутун кэннэ, Саха сирин киин оройуоннара, ол эбэтэр Амма, Нам, Мэҥэ-Хаҥалас, Горнай, Таатта, Томпо, Чурапчы, Уус Алдан, Уус Майа уонна Хаҥалас улууһун энергетиктэрэ субуотунньукка тахсыахтара.
Санатар буоллахха, бу сылга энергетиктэр Якутскоэнерго төрүттэммитэ 60 сылын бэлиэтиэхтэрэ.
«Якутскэнерго» тэрилтэ Киин элэктэриичэскэй ситимнэрин Пресс-сулууспата
