Бу оптуорунньуктан, ол эбэтэр ыам ыйын 10 күнүттэн саҕалаан, хамсык иннинээҕи сылларга курдук, Саха сирин үрдүнэн үгэс буолбут сарсыардааҥҥы сэрээккэни тэрийии саҕаланна. Ити курдук, атырдьах ыйын бүтүүтүгэр диэри өрөспүүбүлүкэ үрдүнэн ыраас халлаан анныгар сарсыардааҥҥы сэрээккэ дьарыктара буолуохтара.
Холобур, Дьокуускай куоракка Матвей Лыткин, Валерий Готовцев, Дмитрий Горохов, Сардаана Ядреева уо.д.а. уопсастыбаннай инструктордар салалталарынан Ленин, Доҕордоһуу, Кыайыы, Орджоникидзе болуоссаттарыгар, «Өрөгөй» успуорт киинин былаһааккатыгар, «Туймаада» стадиоҥҥа, 17-с кыбартаалга баар «Меркурий» атыы-эргиэн киинигэр, Хатас сэлиэнньэ стадионугар хас сарсыарда аайы сэрээккэлээччилэри күүтүөхтэрэ.
