Бүгүн Өлүөхүмэ Хоротун аннынан харан турар мууһу дэлби тэптэриэхтэрэ. Халаан содулун туоратыыга СӨ бырабыыталыстыбатын бэрэссэдээтэлин бастакы солбуйааччыта Дмитрий Садовников үлэлии тиийбит. Санатан этэр буоллахха, манна 25 тэлгэһэни уу ылбыта.
Быйыл өрүскэ уу аҕыйах буолан, муус устуута бытаан, онон өссө даҕаны харыы үөскүүр кутталлаах. Билиҥҥи туругунан, өрүс уута Өлүөхүмэ Хоротуттан ураты, Горнай улууһун Өрт сэлиэнньэтин уонна Кэбээйи улууһун Чагда сэлиэнньэтигэр киирбитэ.
Ордук кутталлаах балаһыанньа муус халыҥыттан Орто Халымаҕа үөскээн турар. Онон манна ыам ыйын 20 күнүгэр оперативнай бөлөх улахан аҥаара тиийиэҕэ. Маны сэргэ, улуус киинигэр кытылы бөҕөргөтүүгэ 8,8 мөл. солк. көрүллүбүт.
Кытылы бөҕөргөтүү өссө Нам улууһугар ыытыллыахтаах диэн үрдүкү салалта пресс-сулууспата биллэрбит.
Оттон соторутааҕыта Троицкай сэлиэнньэни уу ылан олохтоохтору, кыылы-сүөлү атын сиргэ көһөрөн эрэллэр диэн иһитиннэрии кэллэ.
