Ыам ыйын 28-29 күннэригэр Өрөспүүбүлүкэ эдэр талааннарын «Туой-Хайа-2022» ырыа бырааһынньыга ыытыллыаҕа. Онуоха диэри аҕыйах күн хаалла. Эдэр талааннар кэнсиэртэригэр саха эстрадатын сулустара Лэгэнтэй, Күннэй, Дарья Лаврова, норуоппут араадьыйатын чаҕылхай ыытааччыта Амор кыттыыны ылыахтара.
Куорат култуурунай олоҕор кэрэ-бэлиэ түгэннэр үүнүөхтэрэ.
Ыйы-ыйынан кыбартыыларыгар хаайтаран, сахалыы нарын ырыаны истэн кулгааҕы минньипэккэ, кэнсиэрт диэни «эт харахтарынан» көрбөккө олорбут дьон дьэ санаалара манньыйыыһы. Ыам ыйын 28 күнүгэр, киэһэ аҕыс чааска саха эстрадатын «сулуһа» Лэгэнтэй сөҥ, чөллөркөй куолаһынан дуорааннаах оһуохайы этиэҕэ. Оһуохай ыытыллыахтаах сирэ – Ленин болуоссата. Санатан эттэххэ, хас да сыллааҕыта Лэгэнтэй оһуохайыгар аҕыйах ахсааннаах да буоллар олохтоох сахалар үҥкүүлээн, санаалара чэччийбитэ. Билиҥҥэ диэри ону сылаастык ахталлар. Оһуохай буолар чааһа уларыйыан сөп, онон Мииринэй куоратын уонна чугастааҕы бөһүөлэктэр олохтоохторо иһитиннэриилэри болҕойон кэтии сылдьыҥ. Ыйыталаһыҥ, чуолкайдааҥ.
Өрөспүүбүлүкэ Күнүгэр буолбут сүүһүнэн киһи кыттыылаах оһуохай кэнниттэн ыччат дьоҥҥо норуоппут киэн туттар, түмэр, или-эйэни тарҕатар үҥкүүтүгэр кэрэхсэбил үрдээтэ. Урукку курдук кыбыстыы, кэтэмэҕэйдээһин суох.
Сайыммыт субу кэллэ, ыһыахтар чугаһаатылар. Мииринэй олохтоохторо өрөйөн-чөрөйөн биэриҥ!
Станислав Алексеев. Мииринэй куората.
