Ил Дархан Айсен Николаев быйыл СКЭни 100 баалга суруйбут выпускниктарга өрөспүүбүлүкэ 100 сылынан сүүс тыһыынча солкуобайдаах биир кэмнээх төлөбүрү олохтуурун туһунан иһитиннэрдэ.
“СКЭ үөрэнээччи 11 сыллаах үөрэҕин түмүгүн көрдөрөр тургутук. 100 баал – саамай үрдүк көрдөрүү, ону ылбычча ситиспэккин, хас да сыллаах сыралаах үлэ уонна дьаныар түмүгүнэн эрэ ситиһэҕин. Онон сүүс баалы ылбыт үөрэнээччигэ 100 тыһ. солк. харчынан бириэмийэ – туйгун көрдөрүү уонна кыһамньы иһин дьоһуннаах наҕараада буолуоҕар саарбахтаабаппын”, - диэтэ Айсен Сергеевич.
Былырыын Саха сириттэн 30 выпускник СКЭҕэ сүүстүү баалы ылбыта: 13 – литэрэтиирэҕэ, 8 – нуучча тылыгар, 4 – информатикаҕа, 2 – химияҕа, физикаҕа, историяҕа уонна биологияҕа – биирдии выпускник. Саамай элбэх үөрэнээччи сүүстүү баалы 2017 сыллаахха ылары ситиспитэ – 49 выпускник.
