Бэс ыйын 22-24 күннэригэр Дьокуускайга Татарстан күннэрэ ыытыллыахтара.
Саха сиригэр Татарстан бэрэсидьиэнэ Рустам Минниханов салайааччылаах 170 киһилээх улахан дэлэгээссийэ кэлиэҕэ. Бу туһунан култуура уонна духуобунай сайдыы миниистирэ Юрий Куприянов иһитиннэрдэ.
Былырыын Татарстаҥҥа Саха сирин күннэрэ ыытыллыбыттара. Үтүө үгэһи салҕаан, аны биһиэхэ – Татарстан күннэрэ. Ол чэрчитинэн улахан фотобыыстапка, Татарстан бөдөҥ түмэлин быыстапката, икки өрөспүүбүлүкэ суруйааччыларын көрсүһүүлэрэ уонна да атын култуурунай, дьыалабыай тэрээһиннэр ыытыллыахтара.
Маны таһынан куорат олохтоохторо уонна ыалдьыттара Буинскайдааҕы судаарыстыбаннай тыйаатыр испэктээктэрин, оттон Опера уонна балет тыйаатырын уораҕайыгар Татарстан ускуустубатын маастардарын гала-кэнсиэрин көрүөхтэрэ.
