Владивостокка «Мин Саха сириттэн сылдьабын» маҥнайгы Уһук Илиннээҕи устудьуон форума ыытылынна. СӨ Ыччат бырабыыталыстыбатын пресс-сулууспата иһитиннэрэринэн, манна Уһук Илин Владивосток, Хабаровскай уонна Благовещенскай куораттарын үс улахан үөрэҕин кииннэригэр үөрэнэр Саха сирин 60 устудьуона кыттыыны ылла.
Үс күн иһигэр устудьуоннар оонньуулардаах быраактыкаларга, трениннэргэ уонна маастар-кылаастарга кытыннылар. Кыттааччыларга профессионал быһыытынан үүнүү-сайдыы кыахтарын туһунан кэпсээтилэр уонна граҥҥа кыттарга бырайыактары хайдах сөпкө суруйарга үөрэттилэр.
«Форум соругунан, Саха сирин таһыгар үөрэнэр устудьуоннар бэйэлэрин профессиональнай сайдыыларын төрөөбүт өрөспүүбүлүкэлэригэр туһаайыыларын ситиһии буолар. Бу былаһааккаҕа үрдүкү куурус устудьуоннара төрөөбүт эрэгийиэннэригэр туох-ханнык үлэ баарын кытта билсэллэр, карьераларын сайыннарарга былааннарын торумнуулларыгар көмөнү булаллар», - диэн Уһук Илиҥҥэ СӨ Бастайааннай бэрэстэбиитэлэ Ким Борисов бэлиэтиир.
Былаан быһыытынан, форум сыл ахсын ыытыллыаҕа уонна манна экономика араас хайысхатыттан испэсэлиистэр кыттыыны ылар буолуохтара.
Форум түмүгүнэн, кыттааччылар эдэр испэлиис «дорожнай каартатын» уонна дойдуга бэриниилээх буолуу тиэмэтигэр бырайыактар бэлэм идиэйэлэрин көрдөрдүлэр. Бу бырайыактар Бүтүн Арассыыйатааҕы ыччат бырайыактарын куонкуруһугар барыахтара.
Форум тэрийээччитэ – СӨ Ыччат дьыалатыгар уонна социальнай коммуникацияларга Министиэристибэтэ уонна эрэгийиэҥҥэ Ыччат бырабыыталыстыбата кыттыылаах Уһук Илиҥҥэ СӨ Бастайааннай бэрэстэбиитэлистибэтэ.
Форум партнера – өрөспүүбүлүкэ инновационнай экосистематын, IT уонна инновация эйгэлэригэр карьернай сайдыы кыаҕын туһунан сырдаппыт «Якутск» венчурнай хампаанньата.
Форум сүрүн үлэтэ 7 хайысханан барда – доруобуйа харыстабыла, нормотворчество, норуоттар икки ардыларынааҕы ситим, судаарыстыбаннай гражданскай сулууспа, муниципальнай тэриллиилэр, IT уонна инновациялар.
