Дьоллоох Дьокуускай куораппытыгар Оҕо көмүскэлин күнүгэр үгүс тэрээһин ыытылынна ини ыытыллыбата ини. Күн бастакы аҥаарыгар күммүт тыган, сылаас халлаан туран, улахан дьону да, оҕолору да сүргэлэрин көтөхтөҕө. Ол эрээри, икки аҥаар чаас диэки, дьэ турунан, Оҕо көмүскэлин күнүн тэрээһиннэрин көрө-истэ, хаартыскаҕа түһэртии диэн туруммутум баара, хараҥа былыт сабардаата, онтон олох даҕаны ардах кэлэн түстэ.
Инньэ гынан, эбиэт кэнниттэн, самыыры самыыр, чалбаҕы чалбах диэбэккэ, Дьокуускай куорат Хомсомуол болуоссатыгар, сынньалаҥ пааркатыгар уонна аара суолга Оҕо Дьыбарыаһын олбуоругар сырыттым.
Бастаан, улаханнык былытыра, күммүт күлүгүрэ илигинэ, Оҕо дыбарыаһын олбуоругар сырыттым. Онно аспаалга оҕолор уруһуй эгэлгэтин уруһуйдуу сылдьаллар эбит. Онтон Хомсомуол болуоссатыгар тиийиибэр, былыттар ыанньыйдылар, оргууй ардах таммалаата. Манна дьаарбаҥка бөҕө тэриллибит, оонньуу-көр эгэлгэтэ, тустууга күрэхтэһии, киин сыанаҕа оҕолорго көрдөөх тэрээһин буола тура эбит. Салгыы, паарка диэки хаамыыбар, ардах күүһүрэн хаалла. Инньэ гынан, оруобуна, дьон самыыртан хахханы көрдүү, сорохтор дьиэлээри туруммут түгэннэригэр түбэстим быһыылаах. Ол да буоллар, дьон-аймах элбэҕэ сөхтөрөр этэ.
Эгэлгэ, араас өҥнөөх уруһуйдар киһи санаатын көтөҕүөх уратылар
Суол быраабылаларын кытта билсиһии буолбут
Ираида Коркина-Чугдаара хаартыскаҕа түһэриилэрэ
