Саха сиригэр ыам ыйыгар 913 оҕо күн сирин көрбүт: 472 уол уонна 441 кыыс. Сыл бастакы биэс ыйыгар барыта 4397 оҕо төрөөбүт. Итинтэн 2284 уол, 2113 кыыс.
Ил Дархан Айсен Николаев «Төрөппүт албан аата» уордьаны сэттэ оҕону ииппит Людмила уонна Петра Пестряковтар дьиэ кэргэҥҥэ туттарар үөрүүлээх тэрээһиҥҥэ эппитинэн, Саха сирэ оҕо төрөөһүнүгэр Уһук Илиҥҥэ уонна Арассыыйаҕа инники күөҥҥэ сылдьар. Кини биэрэпис түмүгүнэн өрөспүүбүлүкэҕэ 996 тыһыынча киһи олорор буоллаҕына, үбүлүөйдээх сылга 1 мөлүйүөн ахсааҥҥа тиийэр кыахтаахпыт диэн эрэнэрин биллэрбит.
ЗАГС управлениетын иһитиннэриитинэн, төрөппүттэр ыам ыйыгар уол оҕолорго Артем, Владимир, Лев, Максим, Александр, Марк, Матвей диэн ааттары элбэхтик биэрбиттэр. Оттон сэдэх ааттаах уолаттарынан Амор, Елисей, Ефим, Кантемир, Христофор буолбуттар.
Кыргыттарга Ева, София, Алина, Кира, Александра, Полина диэн ааттар киэҥник бэриллибиттэр. Сэдэх ааттаах кыргыттар ахсааннарыгар Аврора, Ангела, Афина, Вилиана, Дара, Мая, Милияна, Нея, Сарыала, Сырдыкчаана, Фэта, Элона, Юна киирбиттэр.
Сонун төрдө: СӨ Бырабыыталыстыбатын уонна Ил Дарханын пресс-сулууспата
