Саха сирин 37 куоратыгар уонна нэһилиэгэр тиэргэннэри, кыра пааркалары «Уһук Илиҥҥэ 1000 тиэргэн» бырагырааманан тупсарыы (благоустройство) үлэтэ саҕаланна. Өрөспүүбүлүкэҕэ бу бырайыакка 124 тиэргэн киирдэ, олортон 75-һэ Дьокуускай куораппытыгар баар.
Үлэ хайдах баран иһэрин туһунан Саха сирин сүрүн архитектора Ирина Алексеева билистэ. Кини ыам ыйын 2 күнүттэн 5 күнүгэр диэри, "LETO Yakutia" Компетенция киинин архитектордарын бөлөҕүн кытта Алдан уонна Нерюнгри оройуоннарыгар сырытта. Сүрүн архитектора кэпсииринэн, билиҥҥи туругунан бары тиэргэннэр эбийиэктэригэр тутар-монтажтыыр үлэ бэдэрээччиктэрэ быһаарылыннылар, оонньуур уонна успуорт тэриллэрин аҕаларга дуогабардар оҥоһулуннулар.
«Нерюнгри, Алдан куораттарыгар, Серебряный Бор нэһилиэккэ бырайыактары олоххо киллэрии үлэтэ актыыбынайдык саҕаланна. Оҥоруу үлэтин графиктара бигэргэннилэр, матырыйааллар кэлэ тураллар, демонтаж үлэлэрэ саҕаланнылар. Ол эрээри, Аллараа Кураанах бөһүөлэккэ уонна Тиит-Эбэ нэһилиэгэр бэлэмнэнии үлэтэ мөлтөх диэн бэлиэтиибит.
Өрөспүүбүлүкэ иккис улахан куоратыгар Нерюнгрига комплекснай үлэ бара турарын чорботобут. Манна «Куорат эйгэтин оҥоруу» («Формирование современной городской среды»), "Уһук Илиҥҥэ 1000 олбуор» («1000 дворов на Дальнем Востоке») уонна «Олохтоох көҕүлээһиннэри өйөбүл» («Программа поддержи местных инициатив») бырагыраамаларынан 11 тиэргэн сирэ-уота тупсарыллыахтаах. Мантан икки олбуор - кыра пааркалар. Бу оҕоҕо аналлаах, успуорт былаһааккалардаах, сынньалаҥ зоналаах, бэйэтэ туспа ис хоһоонноох уонна анал соруктаах тиэргэннэр», - диэн Саха сирин сүрүн архитектора Ирина Алексеева бэлиэтиир.
Тиэргэннэри сэргэ, дьон-сэргэ тоҕуоруһар сирдэрин тупсарыы үлэтэ салҕанар. Бу сылга Нерюнгрига Чиряев аатынан Паарканы, Томмот куорат Пааркатын уонна Алдаҥҥа баар Орто-Сала өрүскэ «Көмүс» («Золотой») эко-паарканы тупсарыы үлэлэрэ түмүктэниэ.
«Үлэ хаамыытыгар тэҥҥэ кыттыһар, оннооҕор үлэ бөлөхтөрүгэр киирсибит Алдан олохтоохторун уонна уопсастыннас үлэтигэр көхтөөхтүк кыттар дьон-сэргэ үтүө көҕүн бэлиэтиэх тустаахпыт», - диэн Ирина Дмитриевна биллэрэр.
Сайын – бырайыактары уонна командировкалары олоххо киллэрии кэмэ. Бу ыйга, Саха сирин сүрүн архитектора федеральнай бырагырааманан тиэргэннэри уонна дьон-сэргэ тоҕуоруһар сирдэрин тупсарыы үлэтэ бара турар Саха сирин атын оройуоннарыгар тиийэ сылдьыа.
Саха сирин Ил Дарханын архитектураҕа уонна куораты тутууга салалтатын пресс-сулууспата.
