Киир

Киир

Субу күннэргэ Мииринэй куоратыттан чугас сытар Алмазнай уонна Арыылаах сэлиэнньэлэрин аттыларыгар хас даҕаны эһэ ордууланар. Бу туһунан Айылҕа харыстабылын кэмитиэтэ сэрэттэ.

Оттон бу соторутааҕыта кусчуттар Мииринэй уонна Сунтаар улуустарын кыраныыссатыгар - Күөллээх үрэх баһыгар икки оҕолоох эhэни көрбүттэр. Кусчуттар суһаллык дьаадыйан биэрбиттэр. Бу эһэлэр үрэҕи таҥнары – Оччугуй Ботуобуйа диэки, дьон олорор сиригэр тугу эрэ үссэнээри иһэллэрэ саарбахтаммат.

Эһэлэри Алмазнай уонна Арыылаах сыбаалкалара интэриэһиргэтэллэр. 2020 сыллаахха күһүн сүүнэ тыатааҕы Арыылаах уотурбатын ыскылаатыгар орох тэбэн турар.

2020 сыллаахха күһүн Арыылааҕы буулаабыт сүүнэ эһэ бултананан турар

Харабынай кыыһы субу адьырҕа дьонтон куотаары түҥнэри көтөн бааһырпытын туһунан суруйбутум.

2020 сыллаахха, атырдьах ыйын саҥатыгар, Арыылаахтан арахпакка буулаабыт, дьоҥҥо улахан кутталламмыт Америка гризлитин саҕа хап-хара амыыкааны олохтоох булчуттар сууһаран тураллар. Аны билигин, эһэлэр Мииринэй 13-с, 6-с, 4-с биэрэстэлэригэр баар даачаларга ас көрдөөн кэлиэхтэрин сөп.

Ити курдук, дьон олорор сиригэр айбардаан, «мөкү кыдьыктаммыт» тыатааҕылар даачаларга дураһыйбыттара ыраатта.

2016 сыллаахха, Мииринэйтэн Ленскэйдиир айан суолун, 13-с биэрэстэтигэр Владимир Березовой ыҥырыалары иитэр пасеката баар этэ. Ону эhэлэр урусхаллаан хаһаайыны ороскуокка тэппиттэрэ.

Тыатааҕы кыыллар даачалар бөхтөрүгэр, быраҕыллар ас тобоҕор саантаатылар. Уопсайынан да, эhэ кыыл үксээн, Мииринэй тула тыаларга отоннооһун да, тэллэй хомуура да уустугуран тураллар.

Маны кэлэр ыйдарга сугуннааччылар, отоннооччулар учуоттуургут булгуччулаах.

Станислав Алексеев. Мииринэй куората.

        

Тарҕат:

Санааҕын суруй

Бүтэһик сонуннар