Быйыл "Якутия" авиахампаанньа аан бастаан Boeing-737 уонна Bombardier Q300 сөмөлүөттэри бэйэтэ өрөмүөннүөҕэ. Ол туһунан "Якутия.Live" биэриигэ авиахампаанньа генеральнай дириэктэрэ Андрей Винокуров иһитиннэрдэ.
"Кулун тутар саҕаланыытыгар омук сөмөлүөттэрин тэхэниичэскэй көрүүтүн ыытарга Росавиацияттан көҥүлү ылбыппыт. Быйыл бэйэбит бастакы дьоһун өрөмүөнү оҥороору былаанныыбыт. Ити биһиэхэ ураты эппиэтинэһи сүктэрэр, хамаандабыт уопуттаах уонна үрдүк квалификациялаах", - диэтэ Андрей Винокуров.
Билигин авиахампаанньа бэлэмнэниини үлэтин ыытар уонна эбии тэрили атыылаһар. Саппаас чаастары АХШтан уонна Дьобуруопаттан Москубанан үс хонук иһигэр аҕалар буоллахтарына, бүгүҥү күҥҥэ аҕалыы болдьоҕо 60 күҥҥэ диэри уһаабыт.
"Саамай сүрүнэ көтүү куттала суох буолуута, быраабылалары чопчу тутуһуу. Саппаас чаастар бары "оригинал" буолуохтара", - диэн Андрей Винокуров эрэннэрдэ.
