Чопчута, Франция “Национальное объединение” баартыйатыттан Европарламеҥҥа дьокутаат Тьерри Мариани Valeurs Actuelles диэн таһаарыыга биэрбит интервьютугар Евросойуус Арассыыйаны утары суолу турунарыгар Илиҥҥи Европа дьайыыта улаханын эппит.
Евросойууһу илиҥҥи өттүгэр ыксалынан кэҥэтии улахан толкуйа суох, ыксалынан быһаарыллыбыта сыыһатын ыйар. “Ол түмүгэр Евросойуус бэйэтин чилиэннэриттэн тутулуктаах буолла. Былыр-былыргыттан Арассыыйаҕа өстөөхтүү сыһыана суох, бары дойдуларга үтүө сыһыаҥҥа тардыһар Соҕуруу Европа латинскай дойдулара тугу этэллэрин истиэх оннугар Брюссель Илиҥҥи Европа дойдуларыттан тутулуктаах буолла”, – диир эбит кини.
“Евросойуус саҥа чилиэннэрин санаатынан баран, Арассыыйа өстөөхтөрүн кэккэтигэр киирдэ”, – диэн туран, итини – Украинаҕа анал эпэрээссийэ биллэриллибит төрүөттэриттэн биирдэстэринэн ааттаабыт. Ону ааһан, парламентарий: "Өскөтүн Европа атын суолу тутуспута буоллар, Арассыыйаны кытта тэйсииттэн туоруо этэ, оттон Украинаҕа иирсээн, чахчы, суох буолуо этэ”, – диэн, анаан бэлиэтээбит.
