Киир

Киир

Санатар буоллахха, бэс ыйын 11 күнүгэр, Нерюнгри оройуонун Нагорнай бөһүөлэгин уонна Нагорнайдааҕы ГСМ ыскылаатын икки ардыгар ойуур баһаара тахсыбытын туһунан иһитиннэрии кэлбитэ. Маныаха, Ыксаллаах быһыы-майгы министиэристибэтин, ГПС уонна оройуон дьаһалтатыттан тэриллибит бөлөхтөр күүстэрин түргэн дьайыыларыттан, баһаары кэмигэр тохтоттулар.   

Өрөспүүбүлүкэ үрдүнэн ааспыт суукка иһигэр 213 га иэннээх сиргэ тахсыбыт ойуур баһаарын умуллардылар. Барыта холбоон 366 га иэннээх тыа баһаарын боҕустулар.

Суһал ыстаап киинэ иһитиннэрэринэн, өрөспүүбүлүкэ соҕуруу оройуоннарыгар этиҥнээх ардах түһүүтэ үгүс. Ааспыт сууккаҕа эрэгийиэммитигэр 707 га иэннээх сиргэ 5 ойуур баһаара тахсыбыта биллэр. Олортон 27 га иэннээх 3 баһаарга умулларыы үлэтэ ыытыллар. Оттон 691 га иэннээх 2 ойуур баһаара атын сирдэргэ тахсыбыт.    

Бу күн саҕаланыаҕыттан, өрөспүүбүлүкэ үрдүнэн 25 ойуур баһаара баара биллэр. Олортон 13-һэ тэйиччи уонна куһаҕан суоллаах-иистээх сиргэ сытар. Оттон нэһилиэнньэлээх пууннарга уонна экэниэмикэ эбийиэктэригэр куттал суоһуура биллибэт. Алдан, Ленскэй, Сангаар, Нерюнрги, Өлүөхүмэ, Уус Майа уонна Үөһээ Дьааҥы тыатын хаһаайыстыбалара 12 ойуур баһаарын утары охсуһаллар. Манна барыта холбоон 282 киһи уонна анал тиэхиникэ үлэлиир.

 «Санатар буоллахха, өрөспүүбүлүкэ үрдүнэн баһаары утары ураты эрэсиим олохтоммута. Баһаар үөскүүр үрдүк куттала баарын иһин, олохтоохтору тыаҕа тахсыыларын уонна уоту туттууга сэрэхтэх буоларгытын ыҥырабыт», - диэн Саха сирин Экологияҕа, айылҕаны туттууга уонна тыа хаһаайыстыбатын миниистирин солбуйааччыта Андрей Коноплев тоһоҕолоон этэр.

Бэс ыйын 13 күнүгэр, өрөспүүбүлүкэ 20 оройуонугар авиациянан патруллааһын былааннанар. Эрэгийиэммитигэр кэлбит «Циклон» зондировщик-сөмөлүөт баһаар тахсыбыт сирдэригэр ардаҕы түһэрии үлэтин салгыы ыытар.

Баһаар кутталын сезона саҕаламмытын кэнниттэн, Саха сирин тыатыгар 6142,6 га иэннээх сиргэ 70 ойуур баһаара тахсыбыта биллэр. Былырыын баччаларга 80 тыһ. га иэннээх 177 тыа баһаара баара биллэр этэ.

 

Тарҕат:

Санааҕын суруй

Бүтэһик сонуннар