Үс Хатыҥҥа, бэс ыйын 25-26 күннэригэр ыытыллыахтаах Туймаада Ыһыаҕар, А.Д. Макарова аатынан Дьокуускайдааҕы култуура уонна ускуустуба коллеһын, Саха сирин норуоттарын төрүт оҥоһуктарын технологиятын уонна дизайнын коллеһын уонна М.К. Аммосов аатынан ХИФУ устудьуоннара волонтер үлэтин толоруохтара.
Кинилэр Үс Хатыҥ сиригэр-уотугар сарсыарда 8 ч. киэһэ 20 ч. диэри сэттэ сырдатар устуойкаларга туруохтара. Эдэр дьон бырааһынньык ыалдьыттарыгар көмөлөһүөхтэрэ, бэйэлэрин миэстэлэрин, саньытаарынай хостору, атыы-эргиэн туочукаларын уонна даҕаны атын сирдэри булууга ыйан-кэрдэн биэрэн, улахан көмөнү оҥоруохтара.
Маны таһынан, волонтер ыччаттар ыалдьыттарга туһаайан, сиргэ-уокка, тэрээһин кэмигэр сөптөөхтүк сылдьыы туһунан быраабылалары, уопсастыбаннай тырааныспар сырыытын туһунан сырдатыахтара.
Ыһыах иннинэ устудьуоннары волонтер бырагырааматын туһунан билиһиннэриэхтэрэ, хайдах үлэлииллэрин үөрэтиэхтэрэ. Волонтердар бары биир кэлим таҥастаах-саптаах буолуохтара.
Дьокуускай куорат уокуругун салалтатын пресс-сулууспата сырдатыытыттан
