СӨ Ил Дархана Айсен Николаев Владимир Михайловтыын көрүстэ. Үлэ Дьоруойа Москуба куоракка сырыытын туһунан санаатын үллэһиннэ. Санатар буоллахха, Арассыыйа күнүгэр, бэс ыйын 12 күнүгэр, Кириэмилгэ дойдубут бэрэсидьиэнэ Владимир Путин үөрүүлээх быһыыга-майгыга Владимир Африкановичка «Арассыыйа Федерациятын Үлэҕэ Дьоруойа» мэтээли туттарбыта.
«Бүтүн судаарыстыба бэрэсидьиэнин илиититтэн наҕарааданы ылыы олус долгутуулаах этэ. Бу иннинэ, 2013 сыллаахха кини миэхэ Бочуот уордьанын туттарбыта. Оттон бу сырыыга, дойдубут бэрэсидьиэнэ церемония саҕаланыан иннинэ миэхэ чугаһаабыта уонна илии тутуспута. Владимир Путин миэхэ салгыы көдьүүстээх үлэни баҕарбыта. Үөрүүлээх быһыыга-майгыга наҕарааданы туттарыы кэннэ, мин 400 миэстэлээх хаһаайыстыба кыылыгар таас комплексы уонна нэһилиэкпитигэр Култуура дьиэтин тутуу туһунан боппуруостары көтөхпүтүм. Бэрэсидьиэн бу боппуруостары быһаарыахпыт диэбитэ», - диэн Үлэ Дьоруойа кэпсиир.
Владимир Михайлов кэпсииринэн, кини кэргэнин уонна кыыһын кытта олус бэркэ сынньаммыттар, дойду киин куоратын бэлиэ миэстэлэрин көрбүттэр-истибиттэр. Арассыыйа күнүгэр кини Поклоннай хайаҕа баар Кыайыы Пааркатыгар судаарыстыбаннай былааҕы көтөҕүү үөрүүлээх сиэригэр-туомугар кыттыбыт.
Үлэ Дьоруойа бэлиэтээн эппитинэн, кини 53-с сылын ыанньыксытынан үлэлиир, бу таптыыр үлэбинэн кэлэр 5-6 сылга салгыы дьарыктаныам диэн былааннанар, онуоха, доруобуйам көҥүллүүр диэн кэпсиир.
Владимир Африканович өрөспүүбүлүкэ, улуус, нэһилиэк салалталарын өрүүтүн өйүүллэрин иһин махталын биллэрдэ.
Айсен Николаев Үлэ Дьоруойугар кытаанах доруобуйаны, оттон «Кириэстээх» кооператив кэллэктиибигэр үрдүк таһаарыылаах көрдөрүүлэри баҕарда.
Сунтаар улууһун «Кириэстээх» тыа хаһаайыстыбатын кэпэрэтиибин биллиилээх ыанньыксыта, Үлэ Албан аатын толору кавалера, Бочуот, «Полярная звезда» уордьаннарын кавалера, өрөспүүбүлүкэ тыатын хаһаайыстыбатын үтүөлээх үлэһитэ Владимир Михайлов судаарыстыба уонна норуот иннигэр үтүө суобастаах, дьулуурдаах үлэтин иһин «Арассыыйа Федерациятын Үлэҕэ Дьоруойа» албан аатыгар тигистэ.
СӨ Ил Дарханын уонна Бырабыыталыстыбатын пресс-сулууспата сырдатыытыттан
