Олоҥхо Ыһыаҕын аһыллыытыгар уонна сабыллыытыгар аҕыс электромобиль ыалдьыттары таһыа. СӨ Тырааныспарга уонна суолга хаһаайыстыбатын Министиэристибэтигэр эппиттэринэн, атын бириэмэҕэ электромобиллэр түөртүү буолан үлэлиир кэмнэригэр, атыттара ииттэриигэ туруохтара.
«СӨ Ил Дархана Айсен Николаев соруйбутунан, СӨ Тырааныспарга Министиэристибэтэ Олоҥхо Ыһыаҕа ыытыллар сирин, маршруттар хайдах сылдьыахтарын сөбүн уонна турар сирдэрин чинчийбит. Оптуобустар сарсыарда 9.00 чаастан отуттуу мүнүүтэ буола-буола сылдьыахтара. Маны сэргэ, «Сүрүн парковка —Түгэхтэй» маршрутунан Кыырт Дала сиргэ таарыйан, электромобиллэр сылдьыахтара», - диэн СӨ Тырааныспарга уонна суолга хаһаайыстыбатыгар миниистирэ Владимир Сивцев иһитиннэрбит. Кини, электромобиллэр ииттэриллэр сирдэрэ ипподром таһынан буолуоҕа диэн этэр. Манна номнуо элэктэриичистибэ уота тардыллыбыт.
Маны таһынан, ыһыах ыалдьыттарын уонна кыттааччыларын сырыыларын чэпчэтэн, Үөһээ Бүлүү сэлиэнньэтин иһинэн үс оптуобус, Харыйалаах уонна Хатырык нэһилиэктэрин холбуур икки оптуобус сылдьыахтара. Барыта холбоон 10-12 оптуобус айанныаҕа.
Маны сэргэ, суол саахала тахсыбатын туһугар, эриэйс буолуон иннинэ суоппардарга мэдииссинискэй бэрэбиэркэ уонна тырааныспардарга техосмотр тэриллиэҕэ.
МАРШРУТТАР:
– № 1 маршрут: Күрдьэлээх уул. – Намныыр тракт – Ленин уул. – Карл Маркс уул. – Октябрьскай уул. – Ленин уул. – Петров уул – Түгэхтэй;
– № 2 маршрут: Кэнтиктиир тракт – Озернай уул. – Карл Маркс уул – Улгумда уул. – 50 лет ЯАССР уул. – Ленин уул. — Петров уул. – Түгэхтэй;
– № 3 маршрут: Карл Маркс уул – М. Потапова уул. – П. Алексеев уул. – М. А. Алексеев уул. — Петров уул. – Түгэхтэй;
– № 4 маршрут: Түгэхтэй – Нам нэһилиэгин Хомустах сэлиэнньэтэ;
– № 5 маршрут: Ипподром сүрүн парковката – Кэнтик нэһилиэгин Харыйалаах нэһилиэгэ.
Санатар буоллахха, Олоҥхо Ыһыаҕа 2022 с. Үөһээ Бүлүү оройуонун Үөһээ Бүлүү сэлиэнньэтигэр бэс ыйын 20-21 күннэригэр ыытыллар.
