Киир

Киир

Бүгүн Уус Алдан улууһун киинигэр Бороҕоҥҥо Саха сирин норуоттарын VIII-с успуорт оонньууларыгар анаан тутуллубут Майаҕатта Бэрт Хара стадионун аһыллыытын кэмигэр хантан да кэлбитэ биллибэт улахан силлиэ түһэн, аймалҕан бөҕөтө таҕыста. Киһи көрөн итэҕэйиэ суох кутталлаах видеолара, хаартыскалара тарҕаннылар. Бороҕоннооҕу уот ыстаансыйатын  салайааччыта Николай Седалищев билигин Бороҕон, Мындааба, Майаҕас, Чараҥ сэлиэнньэлэр уота суох олороллорун, уот ситимин чөлүгэр түһэрии бара турарын иһитиннэрдэ.

Биһиги Бороҕоҥҥо үлэлии сылдьар успуорт суруналыыспытыгар Александр Посельскайга эрийэн туох буолбутун ыйыттыбыт. Кини, маннык дьикти айылҕа көстүүтүн олоҕор маҥнайгытын көрөн, улаханнык соһуйбутун кэпсээтэ: «Майаҕатта Бэрт Хара мэҥэ тааһыттан маҥан торҕону түһэрээттэрин кытары, эмискэ силлиэни кытта хоп-хойуу быыл өрө анньан кэллэ. Силлиэ тугу барытын солоон ааһыах курдук быһыыланна. Онтон туох да сүрдээх күүстээх ардах курулатта. Ол кэннэ тута намыраан хаалла. Халлаан маннык түргэнник уларыйарын хаһан да көрбөтөх буоламмын, олус соһуйдум». Александр иһитиннэрбитинэн, успуорт оонньууларыгар күрэстэһэ кэлбит дьонтон ким да эчэйбэтэх.

Саха сирин норуоттарын VIII-с успуорт оонньууларын үөрүүлээх аһыллыытын бэлэмнии сылдьар хореограф Станислав Степанов бу быһылааҥҥа туох эрэ дьиибэ баарын сөбүлэһиэх курдукпун, олохтоох дьон сиргэ-уокка туох дьайыыны оҥоруохха сөбүн толкуйдуур инилэр диэтэ. Кини, силлиэттэн улаханнык эчэйбит киһи суоҕар эрэнэн туран, барыгытын сарсыҥҥы аһыллыыны көрөргүтүгэр ыҥырда. Аһыллыы Өрөспүүбүлүкэ 100 сылын сэргэ Уус Алдан улууһун төрүттэниитин,  Лөгөй ыспыт ыһыаҕын туһунан буолуоҕа диэн кэпсээтэ.

Оттон олохтоохтор саҥа тутууну саҕалыах, мэҥэ тааһы туруоруох иннинэ сиэр-туом ыытыллыбатах буоллаҕа дуу, сиртэн-уоттан алы гыннахтарына табыллыыһык дуу диэн ытырыктаттылар.  Сорохтор силлиэ төрүөтүн мэҥэ таас турбут сирин кытта ситимнээтилэр: «Саас эбэ ортотугар мэҥэ таас олордуллубутун элбэх киһи аньыырҕаабыта», «Арчылаабатылар, алгыстаабатылар даҕаны... Онно кыыһырда быһыылаах, Майаҕаттабыт» диэн итир-ботур бассаабынан кэпсэттилэр.

Ити кэннэ, модун күүстээх Майаҕатта Бэрт Хара күүһүгэр тэҥнээх силлиэ түспүтүн ким мэлдьэһиэ баарай? Баҕар, чахчы да, баардаах өбүгэбит, тугу эрэ улаханнык сөбүлээбэккэ, баарын биллэрэн барбыта буолаарай?  

Бэйэ корр.  

Тарҕат:

Сэҥээриилэр

Слепцова Анна
+3 Слепцова Анна 04.07.2022 18:27
Сиэри туому тутустулар ини
Ответить

Санааҕын суруй