От ыйын 10 күнүн киэһэ 20.00 чаастааҕы туругунан, Дьааҥы улууһун 3 нэһилиэгэ: Дулҕалаах, Суордаах уонна Үҥкүр ууга барбыттар.
Дулҕалаахха уонна Суордаахха уу кэлиитэ тохтоото диэбиттэрэ да, сарсыҥҥыттан эмиэ ардах түһэрэ сабаҕаланарынан, иккис долгун кэлэр чинчилээх диэн улуус пресс-сулууспата сэрэппит. Билигин Баатаҕай бөһүөлэгэр, Бөтөҥкөс сэлиэнньэтигэр уонна Верхоянскай куоракка дамбалары бөҕөргөтүү бара турар.
Бүгүн Суордаахтан икки бөртөлүөтүнэн 27 оҕону уонна 1 арыалдьыты аҕаллылар. Оҕолору «Бэс чагда» сынньанар уонна чэбдигирэр кииҥҥэ киллэриэхтэрэ. Манна Дьааҥы уонна Кэбээйи оҕолоругар 200 миэстэни бэлэмнээбиттэр.
СӨ Уопсастыбаннай Палатата халаантан эмсэҕэлээбит Дьааҥы олохтоохторугар гуманитарнай көмө (бородуукта, сылаас таҥас, утуйар таҥас, тус гигиена малын-салын) хомуйуутун саҕалаабыт. Көмө оҥоруон баҕалаахтары Дьокуускай к. Курашов уул. 24 N-дээх дьиэтин 5 этээһигэр күүтэллэр. Үп-харчы хомуйуутун туһунан улуус түмсүүтүн салайааччытыттан Гаврил Чемохановтан ыйытыаххытын сөп.
Билсэр төл.: 89142948201
