Николай Захаров олоҕун күөгэйэр кэмигэр, 43 сааһыгар, ууга тимирэн эрэр оҕолору быыһыы сылдьан, былаҕайга былдьаммыта.
Ол иэдээннээх 2020 сыл от ыйын 23 күнүгэр кини уон алта киһилээх улахан бөлөҕү кытта, турфирма өҥөтүн туһанан, өрүһүнэн устар биир күннээх турга барбыта.
Былаан быһыытынан, тур кыттыылаахтара Табаҕаттан киин куорат 203-с түөлбэтигэр диэри катамараннарынан устан кэлиэхтээхтэр этэ. Хомойуох иһин, Николай ол ыра санаата туолбатаҕа. Биир кытылга тохтобул кэмигэр, инструктор эппитинэн, оҕолор “чычаас сиргэ” сөтүөлүү киирбиттэрэ уонна дириҥ, сүүрүктээх сиргэ түбэһэннэр, тимирэн барбыттара. Кини, ону көрөөт, тута быһыы ыстаммыта. Николай оҕолору барыларын куттала суох сиргэ таһаарбыта эрээри, бэйэтэ кыайан быыһамматаҕа. Ити курдук чөл туруктаах, успуорду өрө туппут эдэр, чэгиэн киһи, салайааччы олоҕо олус хомолтолоохтук быстыбыта.
Кэмниэ-кэнэҕэс, икки сыл ааспытын кэннэ, Арассыыйа бэрэсидьиэнэ Владимир Путин Николай Захаровы «Дьон олоҕун быыһаабытын иһин» (За спасение погибавших ) мэдээлинэн наҕараадалыыр туһунан Ыйаах таһаарда. Онон, Николай Захаров ыксаллаах түгэҥҥэ хорсун уонна түргэн дьайыылары оҥорон, элбэх оҕо олоҕун быыһаабыт дьоруойдуу быһыыта хаһан да умнуллуо суоҕа.
Сонун төрдө: CӨ Бырабыыталыстыбатын уонна Ил Дарханын пресс-сулууспата
