Сотору Аллайыахаҕа удамыр сыаналаах балык атыыланар буолуоҕа. Манна аныгы балык сыаҕа үлэҕэ киирдэ. Сыаҕы тутууга өрөспүүбүлүкэ 8 мөл.солк. үбү көрбүтэ. Бу эбийиэк сыанатын 90% сабар кыаҕы биэрбитэ.
Сыахха күҥҥэ 200 кг балык астанара былааннанар. Ол курдук, тымныылыы уонна итиилии ыыһаммыт, кыратык тууһаммыт балык, онтон да атын араас бородууксуйа оҥоһуллуо. Астаммыт балык барыта анал хааҕа угуллан атыыланыа. Сыах тоҥорор камерата 1 туоннаҕа тиийэ балыгы батарар буолан, кооператив бородууксуйаны нэдиэлэҕэ биирдэ тиэйэр буолуоҕа.
«Аллайыаха» төрүт община кооперативын салайааччыта Сергей Бережнов этэринэн, сыах маҥнай олохтоох дьону хааччыйар буолуоҕа, онтон сыыйа-баайа кэҥээн барыаҕа. 1999 сылтан балыктааһынынан, кыыл табаны уонна да атыны бултааһынынан дьарыктанар кооператив сыллааҕы квотата - 300-350 туонна. Маны, сүрүннээн, сайыҥҥы кэмҥэ Индигирка өрүскэ уонна күөллэргэ балыктаан толороллор.
Хаартыска: Мария Васильева (ЯСИА)
