Саха сирин түөрт улууһун сиригэр-уотугар оту-маһы кэрбээн сиир Сибиир “солко өрөөччүтүн” кытары охсуһуохтара.
Саха сирин Экологияҕа, айылҕа баайын туһаныыга уонна ойуур хаһаайыстыбатыгар министиэристибэтэ иһитиннэрбитинэн, Амма, Мэҥэ Хаҥалас, Горнай уонна Нам улуустарыгар уопсайа 59 221,0 гаалаах сири салгынынан хиимийэ ньыматынан ыраастыахтара.
Буортулааччы көрдүгэнин суох оҥорорго «Клонрин КЭ» инсектициди туһаныахтара. Бу препарат куттал суох буолуутугар 3 кылаастаах: дьоҥҥо, ынахха-сүөһүгэ, кыылга-сүөлгэ куттала суох. Атырдьах ыйын 10 күнүттэн балаҕан ыйын 5 күнүгэр диэри хиимийэнэн ыраастааһын кэмигэр ойуурга сылдьыы уонна үөһэ ыйыллыбыт улуустар сирдэригэр-уоттарыгар отонннуур, тэллэйдиир бобуллар.
Эбэн эттэххэ, маннык хиимийэнэн ыраастааһын, ханнык улууска “солко өрөөччү” киэҥник тарҕаммытын көрөн, сыл аайы ыытыллан кэллэ. Бу уодаһыннаах үөн Ураалтан Уһук Илиҥҥэ диэри мутукчалаах ойуурга үөскүүр. Киэҥник тарҕанар кэмигэр түүлээх үөн ыамата ойууру кэрбээн сиэн, ойуур хаһаайыстыбатыгар улахан буортуну аҕалар.
