Саха сиригэр, атырдьах ыйын саҕаланыаҕыттан сиир арыы, үүт, туус, килиэп, бурдук аһа, ириис, просо уонна гречка курууппалара, сүбүөкүлэ, тушенка, оҕо аһылыга уонна кэминэн эриэппэ луугун сыаналара 1-3% үрдээбиттэрэ. Бу туһунан кэтээн көрүү түмүгүнэн Госкомцен иһитиннэрэр.
Ол эрээри, сибиинньэ, балык, мас арыыта, сымыыт, саахар, чэй, вермишель, хортуоска, моркуоп, банаан, апельсин сыаналара 1-5%, оттон пиэрэс, хаппыыста уонна помидор сыаналара 9-13% чэпчээбиттэр. Бэс ыйыттан саҕалаан ынах, бараан, куурусса эттэрин, килиэп уонна мандарин сыаналара уларыйа иликтэр.
«Сыана чөлүгэр түһүүтэ дойдубут уонна Сахабыт сирин дьаһалтата тас бэлиитикэ усулуобуйаларыгар олоҕуран, урбааны өйөөбүт миэрэлэрин түмүгүнэн буолар, маны сэргэ, сайдыбыт конкуренция сабыдыала эмиэ баар. Маныаха, сыана олоҕо суохтук үрдүүрүн тохтотууга урбаанньыттары кытта ыытыллыбыт профилактическай үлэ сабыдыала сүҥкэн», — диэн СӨ Сыанаҕа бэлиитикэтин Судаарыстыбаннай кэмитиэтин бэрэссэдээтэлэ Антонина Винокурова иһитиннэрэр. Өрөспүүбүлүкэҕэ сыана уларыйыытын кэтээн көрүү уонна урбааннары кытта үлэ салҕанар.
Санатар буоллахха, бу сыл кулун тутарыгар уонна муус устарыгар, кэтээн көрүү түмүгүнэн, ас-үөл сыанатын биллэр уларыйыыта бэлиэтэммитэ, оттон сорох бородуукта сыаната 20-30% үрдээбитэ. Оттон ыам ыйыгар уонна бэс ыйыгар балаһыанньа чөлүгэр түһүүтүн сибикитэ биллибитэ, сорох бородуукта сыаната бытаан тэтиминэн түһэн саҕалаабыта.
