«YKT GEEK FEST» поп. култуура бэстибээлигэр "Феникс" анимация устуудьуйата "Айыы оҕолоро" мультсериалы сүрэхтээтэ. Ис хоһоонугар Эрчим уонна Айаана диэн бииргэ төрөөбүт уоллаах кыыс былыргы Саха сиригэр тиийэн, мүччүргэннээх сырыыларга түбэһэллэрин туһунан кэпсэнэр.
«Саха фольклоругар олоҕурбут айыллыбыт бырайыакка үлэлиирбитин олус кэрэхсээтибит. Бу, дьиҥинэн, ситиһии буоллаҕа! Мульсериалга 20-лии мүнүүтэлээх 5 серия баар. Бу маннык устуоруйа ханна баҕарар буолуон сөп эрээри, сахалыы колорит сериалы олус ураты оҥорор. Биһиги дьоҥҥо эрэгийиэн култууратын кытта билсиһиннэриэхпитин баҕарабыт»,– диэн анимация устуудьуйатын тэрийээччитэ Федор Нечитайло кэпсиир.
Сериал билиҥҥитэ оҥоһулла сылдьар, оттон хамаанда сценарийын суруйар, саҥатын-иҥэтин уонна раскадровкатын оҥорууга үлэлэһэр.
"Айыы Оҕолоро" мультсериал - саха фольклоругар олоҕурбут дьиэ кэргэн драмата. Бэстибээл кэмигэр анимация устуудьуйата мультсериалтан быһа тардыыны көрдөрдө. Билиҥҥи кэмҥэ хамаанда бырайыак олоххо киирэригэр спонсор буолуон сөптөөх дьону көрдүүр.
«GEEK FEST» поп.култуура бэстибээлигэр "Феникс" анимация устуудьуйата ыҥырыылаах ыалдьыт буолла. Хамаандаҕа 4 испэсэлиис баар: Фёдор Нечитайло, Софрон Варламов, Вильгельм Чеппе уонна Сергей Федоров. Устуудьуйа толору көҥүл үлэлиир уонна ураты контены айар - мультиктары, комикстары, оонньуулары уо.д.а.
Саина Титова хаартыскалара
