Киир

Киир

Ытыктабыллаах Саха сирин олохтоохторо!

Саха Өрөспүүбүлүкэтин салалтатын уонна тус бэйэм ааппыттан эһигини Россия Судаарыстыбаннай былааҕын күнүнэн ис сүрэхпиттэн эҕэрдэлиибин!

Россия үс өҥнөөх былааҕа хас биирдиибитигэр көҥүл, тутулуга суох буолуу, устуоруйабыт үйэлээх баайыгар ытыктабыл, ыччаты Ийэ дойдуга таптал тыыныгар иитии бэлиэтинэн буолар. Судаарыстыбаннай былаах устуоруйата төрөөбүт дойдуларын туһугар турууласпыт үгүс көлүөнэ дьон сыралаах үлэтин уонна албан аатын кытта ыкса ситимнээх.

Саха сирэ түөрт үйэ кэриҥэ Россия судаарыстыбатын сайдыытыгар дьоһун кылаатын киллэрэр. Ол курдук, биһиги өрөспүүбүлүкэбит дойду хотугулуу-илин өттүн туһаҕа таһаарыы уонна сайыннарыы киининэн буолар, экэниэмикэни сайыннарыыга Уһук Илиҥҥэ эрэ буолбакка, бүтүн Россия үрдүнэн бастыҥнар кэккэлэригэр киирэр. Онуоха Хоту дойду саамай уһук бөһүөлэктэригэр араас омук үлэһит дьону уруйдуу Россия былааҕа тэлээрэр.

Уустук кэмнэр тирээтэхтэринэ Саха сирин олохтоохторо мэлдьи Аҕа дойдубут көмүскэлигэр туруналлара. Бүгүн эмиэ кинилэр аан дойдуну нацизмтан босхолуур туһугар, Россия кэнэҕэскитин атын дойдулар туора өйү-санааны соҥнуур бэрээдэктэриттэн, кыһарыйыыларыттан уонна сабыдыалларыттан тутулуга суох көҥүл судаарыстыба буоларын туһугар дойдубут былааҕын аннынан Украинаҕа буола турар анал байыаннай дьайыыга кытталлар. Бу үрдүк миссияны толоро сылдьар хас биирдии киһинэн биһиги киэн туттабыт!

Бүгүн Саха сирин олохтоохторо үтүөҕэ дьулуурдарын көрдөрөллөр, саҥа былааннары оҥороллор, уустук соруктары быһаараллар. Ол түмүгэр Сахабыт сирин экэниэмикэтэ бигэтик сайдар, национальнай бырайыактар салгыы олоххо киирэллэр, олорор дьиэлэр уонна суоллар, оскуолалар уонна оҕо уһуйааннара, балыыһалар уонна поликлиникалар, култуура дьиэлэрэ уонна успуорт эбийиэктэрэ тутуллаллар. Судаарыстыба кыра дохуоттаах дьоҥҥо уонна нэһилиэнньэ көмүскэлэ суох араҥатыгар социальнай көмөнү оҥорор.

Төрөөбүт дойдубут өссө эбии күүстээх, сайдыылаах держава буоларын туһугар салгыы бары бииргэ үлэлиэхпит диэн эрэнэбин.

Россия Судаарыстыбаннай былааҕын күнүнэн!

Эһиэхэ дьолу-соргуну, чэгиэн-чэбдик туругу, этэҥҥэ буолууну баҕарабын! Үлэҕит-хамнаскыт табылыннын, саҕалаабыккыт сатаннын! Бука барыгытыгар – үтүөнү, или-эйэни!

Саха Өрөспүүбүлүкэтин Ил Дархана Айсен Николаев

Тарҕат:

Санааҕын суруй

Бүтэһик сонуннар