Бэҕэһээ, атырдьах ыйын 15 күнүгэр, Дьокуускайдааҕы IT-паарканы көрүү-истии кэмигэр, СӨ Ил Дархана Айсен Николаев Арассыыйа премьер-миниистиригэр Михаил Мишустиҥҥа «Extra Cinema» дойдутааҕы кинопрокат ситимин сайдыытыгар оҥорбут үлэтин көрдөрдө. Бу бырайыагы атырдьах 27 күнүттэн Саха сирин үс нэһилиэнньэлээх пуунугар үлэлэтиэхтэрэ. Саха сиригэр оҥоһуллубут бырайыак көмөтүнэн, кыра даҕаны нэһилиэктэр бэйэлэрэ киинэ тыйаатырданар кыахтаннылар.
Айсен Николаев бырайыагы көрдөрүү кэмигэр бэлиэтээн эппитинии, саха киинэ проекторын уратыта серверын үлэтигэр сытар. Бу үчүгэйэ диэн, аптамаат быһыытынан ааптарыскай быраап сыаналарын кэтээн көрөр, испииһэккэ киллэрэр, төһө сыаналааҕын быһаарар. Оччоҕо кыра нэһилиэктэргэ уонна култуура дьиэлэригэр киинэ прокатын тэрийиигэ хоромньу кыччыыр.
«Билигин киинэ саалалара американскай киинэ проектордарыгар үлэлииллэр. Оттон биһиги тэрилбит сыаната лаппа кыра. Тоҕо биһиги бу бырайыагы оҥорбуппутуй? Тоҕо диэтэргит, саха киинэтин позицията күүстээх. Биһиги манна ааптарыскай бырааптарбытын көмүскүөхпүтүн уонна Арассыыйа уопсай ырыынагар салгыы таһаарыахпытын баҕарабыт. Биһиги билигин 3 тыһыынчаттан тахса олохтоох нэһилиэнньэлээх пууннарга киинэ саалаларын үлэлэтиэхпитин сөп, эрдэ киинэни көрдөрүү хоромньутун саппат этэ», - диэн Айсен Николаев этэр.
«Мин саныырбынан, биһиги Ольга Борисовнаттан (Ольга Любимова, РФ Култуураҕа миниистирэ) проектор кыаҕын кытта билсиһэригэр көрдөһүөхпүт. Бүгүҥҥү туругунан, сааҥсыйалартан сылтаан үгүс киинэ тыйаатырдара кураанахтар. Контены оҥоруу – биир боппуруос, оттон тэрил сыаната ыараханын боппуруоһа – атын», - диэн Михаил Мишустин санаатын эттэ.
Бэлиэтээн эттэххэ, Саха сиригэр оҥоһуллубут бырайыак Арассыыйаҕа киинэни быракааттыырга тахсыан сөп. Бырайыагы «Якутск» Технопааркаҕа таҥаллар. Сыаната тас дойдулар киэннэриттэн 9 төгүл чэпчэки. Эрдэ Айсен Николаев «Российская креативная неделя» тэрээһиҥҥэ «Extra Cinema» бырайыагы көрдөрбүтэ.
Атырдьах ыйын 27 күнүгэр, киинэ тыйаатырдара саҥа киинэ проектордарынан аан бастакытын Саха сирин үс нэһилиэктэригэр киинэлэри көрдөрүөхтэрэ – Мэҥэ Хаҥалас оройуонун Төҥүлүтүгэр, Уус Алдан оройуонун Сыырдааҕар уонна Чурапчы улууһун Одьуулунугар. Онно тиийбит киинэ проектордара биир кэлим автоматизированнай информационнай систиэмэҕэ уонна Пушкинскай каартаҕа холбонуохтара.
Бу сыл бүтүөр диэри маннык бырайыактары өссө 7 нэһилиэккэ үлэлэтиэхтэрэ – Горнай улууһун Дьиикимдэ уонна Маҕарас нэһилиэктэригэр, Ньурба оройуонун Антоновка нэһилиэгэр, Үөһээ Бүлүү оройуонун Сайылыгар, Нам оройуонун Аппаанытыгар, Уус Алдан Оҕуруоттааҕар уонна Кэбээйи улууһун Кэбээйи нэһилиэгэр.
СӨ Ил Дарханын уонна Бырабыыталыстыбатын пресс-сулууспатаМария Васильева хаартыскаҕа түһэриилэрэ
