Киир

Киир

Дьокуускай баһылыга Евгений Григорьев Саха сирэ Арассыыйа судаарыстыбатын састаабыгар киирбитэ 390 сылыгар анаммыт “Төрөөбүт куораппыт тупсарын уонна сайдарын туһугар” хаартысканан документальнай быыстапкаҕа сырытта. Быыстапка дьоруойдара номох буолбут ытык дьоммут – Дьокуускай куорат бочуоттаах олохтоохторо – буоллулар. Дьоһун быыстапкаҕа Саха сирин Национальнай архыыбын пуондатыттан өрөбөлүүссүйэ иннинээҕи олоҕу көрдөрөр докумуоннар, хаартыскалар эмиэ турдулар.

Евгений Григорьев эҕэрдэ тылыгар экспозиция устуоруйаҕа улахан суолталааҕын, куорат сайдарыгар, тупсарыгар, кэми кытта тэҥҥэ хардыылыырыгар олохторун анаабыт ытык дьоҥҥо убаастабыл бэлиэтин көрдөрөрүн бэлиэтээтэ.

“Быыстапкаҕа өрөспүүбүлүкэбит киинэ сайдарыгар кылааттарын киллэрбит куорат бочуоттаах олохтоохторо сырдатыллаллар. Бу – билиҥҥитэ биһиги маҥнайгы бырайыакпыт. Кэнэҕэһин өссө кэҥиэҕэ, сайдыаҕа, – диэн баһылык эттэ.

Быыстапкаҕа хаартыскалар, докумуоннар маннык түһүмэхтэринэн турдулар:

– “Дьокуускай куорат бочуоттаах олохтоохторо өрөбөлүүссүйэ иннинэ”.

– “Бэйэ туппут тутуутун көрөр саҕа үчүгэй суох...”.

– “Мин бэйэбэр эрэллээх этим”.

– “Үлэ маршала”.

– “Кини архитектураны убаастыырга уһуйбута”.

– “Холкутук олорорбун ахсарбаппын...”.

– “Дьокуускай – төрөөбүт куоратым”.

Тэрээһиҥҥэ СӨ Култуураҕа уонна духуобунай сайдыыга миниистирин бастакы солбуйааччы Владислав Левочкин, Дьокуускай куорат Дууматын бэрэссэдээтэлэ Альберт Семенов кытыннылар. Кинилэр этэллэринэн, быыстапка, бырааһынньыктааҕы тэрээһиннэр устуоруйаҕа дьоһун суолталаахтар.

Дьокуускай бочуоттаах олохтоохторугар анаммыт быыстапка балаҕан ыйын 30 күнүгэр диэри куорат дьаһалтатын 2-с этээскэ баар фойетыгар туруоҕа.

Куорат Бочуоттаах олохтоохторун быыстапката

Тарҕат:

Санааҕын суруй

Бүтэһик сонуннар