Саха сирин энтузиастарын эспэдииссийэтэ Де-Лонг архипелаг Беннет арыытыгар тиийдэ. Салайааччылара - Арассыыйатааҕы быыһааччылар сойуустарын Саха сиринээҕи салаатын бэрэссэдээтэлэ Николай Находкин. Бу эспэдииссийэ Саха АССР төрүттэммитэ 100 сылыгар анаммыт. Көҕүлээһини Нуучча географическай уопсастыбата уонна өрөспүүбүлүкэ үгүс тэрилтэлэрэ өйөөбүттэр.
«Эспэдииссийэ чилиэннэрэ Беннет арыыга тиийэр соругу туруорбуттар. Биэрэк кытылыттан Беннет арыытыгар диэри ырааҕа 850 килэмиэтир. Бэҕэһээ спутник сибээһинэн эспэдииссийэ чилиэттэрэ Беннет арыытыгар тиийбиттэрин туһунан үөрүүлээх сонуну эттилэр!» - диэн СӨ Ил Дархана Айсен Николаев бэйэтин телеграм-ханаалыгар кэпсээбит.
СӨ Ил Дархана эрдэ этэн аһарбытын курдук, Нуучча географическай уопсастыбата дойду эрэгийиэннэрин уонна Саха сирин сайдыытыгар улахан кылаатын киллэрэр. Өрөспүүбүлүкэ Нуучча географическай уопсастыбатын кытта үөрэҕириигэ уонна сырдатыыга сыһыаннаах бырайыактары олоххо киллэрэр, маны таһынан, историко-этнографическай эспэдииссийэлэри ыытар.
Эспэдииссийэ кыттыылаахтара арыыга диэри үрүллүбүт катамараннарынан, Лаптев уонна Илиҥҥи-Сибирскэй муораларынан 800 тахса килэмиэтири айаннаабыттар. Манна Арассыыйа уонна Саха сирин былаахтарын, православнай кириэһи уонна саха сэргэтин туруоруохтара. Маны сэргэ, арыы харыстанар сиригэр-уотугар быыһанар дьиэ уонна научнай стационар быһыытынан саха балаҕанын тутуохтара. Хамаанда чилиэннэрэ Арктикаҕа бэйэлэрин научнай чинчийиилэрин салҕыахтара.
Санатар буоллахха, 2020 сыллаахха Нуучча географическай уопсастыбатын өйөбүлүнэн эспэдииссийэ бастакы түһүмэҕэ ыытыллыбыта. Саха сирин олохтоохторо аан маҥнайгытын үрүллүбүт катамараннарынан Өлүөнэ өрүһүнэн устан Лаптев муоратыгар, онтон Улахан Ляховскай арыыга тиийбиттэрэ. Эспэдииссийэ иккис түһүмэҕэ бу сыл от ыйыгар Усуйаана оройуонун сириттэн саҕаламмыта.
Беннет арыыта – Арассыыйа уһук хоту арыыларыттан биирдэстэрэ, Новосибирскай архипелагка киирсэр.
СӨ Ил Дарханын уонна Бырабыыталыстыбатын пресс-сулууспата