Киир

Киир

Саха сирин дзюдоҕа оскуолатын иитиллээччитэ Карина Ефимова бүтүн Арассыыйатааҕы спартакиадаҕа кыһыл көмүс мэтээли ылла, кини муҥутуур күүстээхтэр кэккэлэригэр кыайыылааҕынан ааттанна. Күрэхтэһии Казань куоракка буолла. Кыысчаан 52 киилэ ыйааһыннаахтарга диэри утарсааччыларын кыайан, Арассыыйа үрдүнэн бастыҥ дзюдоистка буоларын биллэрдэ.

Бастакы киирсиигэ Карина Дьобуруопа Кубогын призерын, Тверскэй уобаластан сылдьар Елизавета Степанованы кыайда. Онтон ордук уопуттаах, күүстээх утарсааччы кинини аныгыс киирсиигэ күүтэр этэ. Онно кини Арассыыйа түөрт төгүллээх чөмпүйүөнүн, Дьобуруопа чөмпүйүөнүн, Москваттан сылдьар Анастасия Поликарпованы кыайбыта. Манна даҕаны биһиги биир дойдулаахпыт Карина Ефимова бэйэтин иннин биэрбэтэ уонна полфиналга таҕыста. Салгыы, Сахабыт сирин кыысчаана Дьобуруопа Кубогын призерын, Санкт-Петербургтан сылдьар Глафира Борисованы кыайда.

Кыһыл көмүс мэтээл иһин киирсиигэ, Карина Аан дойдутааҕы күрэхтэһии кыайыылааҕын, Дьобуруопа Кубогын хаһаайкатын Саратовскай уобаластан Лилия Нугаеваны кытта кимэн кииристэ. Киирсии уонтан тахса мүнүүтэни быһа салҕанна.

Түмүккэ, Сахабыт сирин кыысчаана кыайыыны аҕалар быраҕыыны оҥорон, Арассыыйатааҕы күүстээхтэр спартакиадаларын бастыҥ наҕараадатын, кыһыл көмүс мэтээли ылар чиэскэ тигистэ. Санатар буоллахха, бу иннинэ 78 киилэҕэ диэри ыйааһыннаах киирсээччилэргэ үрүҥ көмүс мэтээли Саха сириттэн Надежда Татарченко ылбыта.

Хаартыска Арассыыйа дзюдоҕа Федерациятыттан ылылынна

Тарҕат:

Санааҕын суруй