Дьокуускай куорат уокуруктааҕы дьаһалтатын 2022 сыл ыам ыйын 6 күнүнээҕи 118№-дээх дьаһалынан, балаҕан ыйын 1 күнүттэн сүүрбэттэн тахса маҕаһыыҥҥа уонна дьону аһатар эбийиэккэ арыгы атыыта тохтуоҕа. Арыгы атыытын аҕыйатыы манан бүппэт ини диэн эрэли кытта туохтан манныкка тиийбиттэрин көрүөххэ.
Бу дьаһал тахсыбыт төрүөтүнэн арыгы атыылыыр эбийиэк социальнай эбийиэктэртэн тэйиччи турар устата улаатан биэрбитэ буолар. Ол курдук саҥа ирдэбилинэн, арыгы атыылыыр сир оскуолаттан – 300 миэтэрэ, оҕо саадыттан, успуорт эбийиэгиттэн, тырааныспар уонна доруобуйа харыстабылын эбийиэгиттэн – 200 миэтэрэ, оттон элбэх кыбартыыралаах олорор дьиэлэртэн – 50 миэтэрэ тэйиччи туруохтаах. Маны кытта, арыгы атыылыыр эбийиэк социальнай эбийиэктэн төһө тэйиччи турарын, урукку курдук хаамыы устатынан буолбакка, радиуһунан ааҕар буолбуттара сабыдыаллыыр.
Онон, мээрийэ сайтыгар ирдэбили кэһэр, сабыллыахтаах 24 маҕаһыын испииһэгин таһаарбыттар. Бу киһини үөрдэр саҕалааһын эрээри, манна оскуолаттан, олорор дьиэлэртэн ала-чуо чугас турар сорох арыгы маҕаһыыннара тоҕо эрэ киирбэккэ хаалбыттара сонньутта. Тоҕо киирбэтэхтэрин сотору быһаарсан көрүөхпүт. Испииһэги манна киирэн көрүөххүтүн сөп: https://yakutskcity.ru/press-tsentr/bolee-20-magazinov-v-yakutske-prekratyat-realizatsiyu-alkogolya-s-1-sentyabrya/
Сонун төрдө: Дьокуускай куорат уокуруктааҕы дьаһалтатын пресс-сулууспата
