География уобалаһыгар үтүө суобастаах үлэтин иһин, «Пути великих свершений» бырайыак ааптара уонна салайааччыта Георгий Никонов наҕараадаланна. Нуучча географическай уопсастыбатын бэрэсидьиэнэ Сергей Шойгу илии баттааһыннаах наҕарааданы Нуучча географическай уопсастыбатын V бэстибээлин сүрүн сыанатыгар, «Дойти края. Сибирский континент» диэн хартыынаны көрдөрбүттэрин кэнниттэн туттардылар.
«Нуучча географическай уопсастыбата улахан үлэни ыытар – эрэгийиэннэри бэйэ-бэйэлэрин кытта билиһиннэрэр уонна иннин диэки хамсатар. Саха сирэ география өттүттэн ордук интэриэһинэй эрэгийиэн буолан, бу хайысхаҕа бастыҥнара буолар толору кыахтаах. Салгыы, Нуучча географическай уопсастыбатын кытта биһиги хас даҕаны интэриэһинэй бырайыактары олоххо киллэрэбит», - диэн Айсен Николаев Нуучча географическай уопсастыбатын бэстибээлин кэмигэр эппитэ.
Георгий Никонов көрөөччүлэргэ бэйэтин историческай документальнай хартыынатын туһунан кэпсээбитэ. Бу үлэтинэн кини дойдуга бэриниилээх буолуу иэйиитин тилиннэрэр уонна дойду устуоруйатын сыыһа тарҕаппат туһуттан оҥорбута. Маны таһынан, бэстибээл чэрчитинэн, Георгий Никонов «Пути великих свершений» дакылаатынан кыттыбыта.
Бырайыак Арассыыйа Судаарыстыбата Илин Сибиири, Уһук Илини, хотугулуу-илин Евразийскай кэнтиниэни, Алясканы уонна Хотугу Америка Арҕааҥҥы кытылын баһылаабыттарын туһунан устуоруйаны кэпсиир. Бу элбэх сиэрийэлээх хартыына идиэйэтэ – Саха сиригэр олорор норуоттар бу улахан глобальнай дьайыыга туох оруолу толорбуттарын сырдатыы. Киинэ бэргэн этиитэ: «Саха сирэ – Арассыыйа Уһук Илини баһылааһыныгар сүрүн пост (форпост)».
«Дойти до края. Сибирь кэнтиниэнэ» маҥнайгы киинэ нуучча бастакы айанньыттара 40 сыллааҕы географическай арыйыылары оҥорбут кэмнэрин көрдөрөр. Бу үлэ 2021 сыллаахха сайын СӨ Ил Дархана Айсен Николаев көҕүлээһининэн саҕаламмыта.
Санатар буоллахха, Москубаҕа «Зарядье» пааркаҕа атырдьах ыйын 18 күнүттэн 28-р диэри Нуучча географическай уопсастыбатын V бэстибээлэ буолан ааспыта. Бу улахан географическай бырааһынньыкка, Саха сирэ Арассыыйа судаарыстыбатыгар киирбитэ 390 сылын уонна Саха АССР төрүттэммитэ 100 сылын чэрчитинэн, Саха сирин күнэ буолан ааспыта.
СӨ Ил Дарханын уонна Бырабыыталыстыбатын пресс-сулууспата суруйуутуттан
