Дьокуускайга балаҕан ыйын 1 күнүттэн уулуссаҕа ыйаммыт суол быраабылатын кэһиини кэтиир камералар бырагыраамаларын уларытан, ким курдаах, эбэтэр кура суох айаннаан иһэрин массыына иһиттэн курдаттыы көрөр буоллаллар диэн киһи итэҕэйэр дьоно кэпсээтилэр.
Курдаммыт киһи кура уоту тэйитэрдээх буолан, камераҕа көстөр эбит. Онон курдаммакка иһэр суоппары начаас туталлар.
“Сэрэппэккэ сиэтилэр” диэбиккэ дылы, камералар күүһүрбүттэрин билбэккэ, кура суох айаннаан иһэн улахан ыстараапка түбэһиэххэ сөп. КоАП 12.16 ыстатыйатынан, курдамматах ыытааччы 1 тыһ. ыстарааптанар. Дьээбэтэ диэн, биир күн хаста да түбэһиэххэ сөп. Оччоҕо ыстараабыҥ улаатан иһэр. Холобур, уон төгүл түбэстэххинэ, 10 тыһ. төлүүргэ тиийиэххин сөп.
Инники уонна кэнники олорор пассажирдар эмиэ курданыахтаахтар. Арай эргэ кэнники олоххо кура суох массыынаҕа курдаммакка олоруохха сөп. Пассажир кура суоҕун иһин 500 солк. ыстараап төлүүр. Суоппар ити кэһии иһин эмиэ 1 тыһ. солк. төлүөн сөп.
Онон убаастабыллаах массыына ыытааччылар, Дьокуускай устун айанныыргытыгар курданан олоруҥ.
Бэйэ кэр.
