Арассыыйа бэрэсидьиэнэ Владимир Путин Украинаҕа сыһыаннаах дьоһун суолталаах этиини бэлэмниир. Кини бу туһунан балаҕан ыйын 7 күнүгэр Илиҥҥи Экономическай Форум пленарнай мунньаҕар этиэхтээх. Сонуну «Москва. Кремль. Путин» бырагыраама ыытааччыта Павел Зарубин иһитиннэрэр.
«Украинаҕа сыһыаннаах саҥа этиилэри күүтэр оруннаах. Форум пленарнай мунньаҕа балаҕан ыйын 7 күнүгэр буолуохтаах», - диэн Зарубин этэр.
Илиҥҥи Экономическай Форум балаҕан ыйын 7 күнүттэн 8 күнүгэр диэри Владивосток куоракка ыытыллыахтаах. Форум дьыалабыай программатынан 90 тэрээһин буолара күүтүллэр.
Эрдэ Владимир Путин пресс-сэкэрэтээрэ Дмитрий Песков эппитинэн, балаҕан ыйын 5 күнүгэр саҕаланыахтаах РФ бэрэсидьиэнин форумнааҕы бырагырааматыгар Уһук Илин икки эрэгийиэнигэр сылдьыы киирэн турар. Ол курдук, балаҕан ыйын 6 күнүгэр Владивосток куоракка Владимир Путин «Восток-2022» сэбилэниилээх күүстэр стратегическай үөрэтиилэрин кэтээн көрүөҕэ. Оттон, балаҕан ыйын 7 күнүгэр, Илиҥҥи Экономическай Форум пленарнай мунньаҕын иннинэ, бэрэсидьиэн форум сүрүн сиэссийэлэрин модератордарын кытта алтыһыаҕа.
«URA.RU» саайтан
