VII-с Илиҥҥи экономическай форумҥа Уһук Илиннээҕи федеральнай уокурукка «Сыл экспортера» Бүтүн Арассыыйатааҕы бириэмийэ кыайыылаахтаарын чиэстээтилэр.
«Сахачай» хампаанньа «АПК бэлэм бородууксуйатын эйгэтигэр сыл экспортера» анал аакка иккис миэстэни ылла, оттон салайааччылара Нюргуяна Заморщикова «Бастыҥ дьахтар экспортер» анал аакка үһүс миэстэни ылла. Кыайыылаахтары СӨ Ил Дархана Айсен Николаев эҕэрдэлээтэ. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.
«Саха сирэ сиртэн хостонор баайдааҕынан биллэр, ол эрээри, кэлиҥҥи сылларга биһиги сырьевойа суох экспортка улахан болҕомтобутун уурабыт. Билигин айти-өҥөлөрү оҥоруу экспорда улаатан эрэр. Ас-үөл табаардара, экологичность өттүнэн ирдэнэр табаардар таска тахсыылара үөскээн эрэриттэн үөрэбин. Биһиги кыра уонна орто урбааммытыгар өйөбүл буолар экспортнай кииҥҥэ махталбын тиэрдэбин. Уһук Илин тэрилтэлэрэ Аан дойдутааҕы ырыынакка тахсыылара элбиэҕин баҕарабын. Сааҥсыйалар, дьиҥинэн, биһиги хампаанньаларбыт саҥа ырыынакка тахсалларыгар кыахтары биэрэллэр», - диэн Айсен Николаев бэлиэтээн этэр.
Куонкурус кыайыылаахтарын уонна призердарын быһаарыы икки түһүмэҕинэн ыытыллар: бастакы – хас биирдии федеральнай уокурукка, иккис – дойду таһымыгар.
«Бүгүн күүстээх экспорт потуоктара Соҕурууҥҥу Илин Азияҕа туһаайыллаллар. Маныаха, биһиги экспорпут бу хайысхаҕа диверсифицированнай буолуута уонна конкуренциялыан сөптөөх табаардары көрдөрүүтэ улахан суолталаах. Уһук Илин тэрилтэлэрин иннигэр бэйэ экспортнай кыаҕын олоххо киллэриигэ улахан кыахтар арыллаллар. Бу кыахтар толору олоххо киириэхтэрэ диэн эрэнэбин», - диэн Арассыыйа Федерациятын бырамыысаланнаска уонна атыыга миниистирин солбуйаччыта Василий Осьмаков бэлиэтээн этэр.
Экспорт хайысхатыгар ураты түмүктэри ситиспит тэрилтэлэри уонна урбаанньыттары көҕүлүүр туһуттан, Арассыыйа Федерациятын Бырабыыталыстыбата «Сыл Экспортера» диэн бириэмийэни олохтообут.
