«Цифровой табаһыт» («Цифровой оленевод») бырайыак чэрчитинэн, «Кындыкаан» айар бөлөх салайыытынан, 8 сыыппара (цифровой) табалаах NTF кэллиэксийэтэ таҕыста. Оҥорон таһаарааччынан 3D-скульптор Нюргун Оготоев буолла.
Идиэйэни олоххо киллэрбит ааптардар этэллэринэн, бу бырайыак табаһыттарга эбии дохуоту киллэринэр кыаҕы биэриэҕэ. NFT-га, ол эбэтэр аватарга, дьиҥнээх таба тэйиччиттэн сыһыарыллан сылдьар. Оттон GPS-трекер көмөтүнэн кыылы кэтээн көрүөххэ сөп. Маныаха, киһи бэйэтин табатыгар бэлэх-туһах атыылаһыаҕын уонна кыылы күүс-уох өттүнэн сайыннарыаҕын сөп.
Бырайыак аныгы коммуникация – блокчейн, социальнай ситимнэр уонна виртуальнай реальность ньымаларынан эбээн омук уонна да атын хотугу аҕыйах ахсааннаах төрүт омуктар култуураларын тарҕатар кыахтанна. Кындыкаан хамаандата уонна бырайыак ааптара Маргарита Попова этэллэринэн, табалары сыыппара эйгэтигэр көһөрүү көс омуктар брендэлэрин саҥа култуурунай таһымҥа таһаарар кыаҕы биэрэр.
Бырайыак туһунан сиһилии бу сигэнэн билсиэххэ сөп http://kyndykan.com/metaverse.
Ыспыраапка: NFT — дьиҥнээх сиргэ баар эбийиэктэри, ол быыһыгар ускуустубаны, музыканы, оонньуур бэрэдимиэттэри уонна видеолары сыыппара эйгэтигэр көрдөрөр актив. Манныктары куйаар ситимиттэн, биир үксүн криптовалютанан атыылаһыахха сөп. Сүрүннээн бу активтар син биир үгүс криптовалюталар курдук базовай хааччыйар бырагырааманан үлэлииллэр.
