Бу күннэргэ Дьокуускайга, Нам, Мэҥэ-Хаҥалас, Хаҥалас, Горнай, Чурапчы, Таатта, Уус Алдан, Амма, Уус Майда, Алдан, Томпо, Кэбээйи уонна Үөһээ Дьааҥы оройуоннарыгар сөкүүндэҕэ 15-20 миэтэрэ түргэннээх күүстээх тыал түһэрэ күүтүллэр. Бу туһунан Саха сиринээҕи Гидрометеорология сулууспатын салалтата иһитиннэрэр. Маны таһынан, Чурапчы, Таатта, Уус Алдан, Амма, Уус Майда уонна Томпо улуустарыгар сорох сиринэн күүстээх ардах түһүөҕэ.
Бээтинсэҕэ, балаҕан ыйын 9 күнүгэр, киин, соҕурууҥҥу оройуоннарга, күнүһүн хотугулуу-илиҥҥи оройуоннарга циклон кэлиитинэн, ардахтаах уонна тыаллаах буолуоҕа. Сорох сиринэн сөкүүндэҕэ 15-20 миэтэрэ түргэннээх тыаллаах күүстээх ардахтар түһүөхтэрэ. Түүн салгын температурата +3...+8 кыраадыс, күнүс +8...+13 кыраадыс буолуоҕа.
Саха сирин арҕаа эҥэригэр сөҥүү түһэрэ күүтүллүбэт, тыал орто күүстээх буолуоҕа. Түүн салгын температурата 0... +5, халлаан ырааһырдаҕына 0...-5, күнүс +10...+15 буолара сабаҕаланар. Оттон соҕуруулуу-арҕаа +19 кыраадыска тиийэ сылыйыаҕа.
Өрөспүүбүлүкэ киин куоратыгар сөҥүү түһэрэ күүтүллүбэт. Түүн салгын температурата +5...+7 кыраадыс буолуоҕа, күнүһүн салгын +12 диэри сылыйыаҕа. Сөкүүндэҕэ 15-20 миэтэрэ түргэннээх күүстээх тыал түһүүтэ күүтүллэр.
Санатар буоллахха, эрдэ халлааны кэтээн көрөөччүлэр иһитиннэрбиттэринэн, Саха сиригэр «Хинамнор» тайфун кэлэрэ биллэр этэ. Халлаан туруга нэдиэлэ бүтүүтэ көнүөҕэ.
