Бэҕэһээ күүстээх тыал түспүтүн содулугар, Дьокуускай куорат уонна куорат кытыытынааҕы эниэргийэлээх эбийиэктэргэ хоромньу тахсыбыт. Онон, энергетиктар биригээдэлэрэ күүстээхтик чөлүгэр түһэрии үлэтин ыыталлар. Бүгүн тахсыбыт дьиэктэри суох оҥорууга 50 киһилээх 13 биригээдэ үлэлиир. Бу туһунан «Якутскэнерго» тэрилтэ пресс-сулууспата иһитиннэрэр.
Элэктэриичэстибэни туһанааччылартан Киин элэктэриичэскэй ыстаансыйа суһал-диспетчердээх сулууспатыгар 234 сайаапка киирбит. Маны таһынан, 6-10 уонна 100 КВ-х күүстээх элэктэриичэстибэни ыытыы лиинийэлэригэр 16 технологическай кэһии тахсыбыт. Түүн иһигэр бары тахсыбыт дьиэктэри чөлүгэр түһэрбиттэр.
Түүҥҥү симиэнэҕэ энергетиктар биригээдэлэринэн Сэргэлээх шоссетын 4-с, 6-с уонна 7-с килэмиэтириттэн, Хатыҥ Үрэх шоссетын 1-кы, 2-с даамбатыттан, авиапорт, авиагруппа оройуоннарыттан, Маҕанныыр суол 9-с килэмиэтириттэн, Губин уонна Богатырев ааттарынан уулуссалартан барыта холбоон 43 сайаапка киирбитин көрбүттэр, кэһии тахсыбыт миэстэлэрин көннөртөөбүттэр.
"Бастатан туран, олохтоох дьон олоҕор уонна доруобуйатыгар кутталы үөскэтэр кэһиилэри суох гынныбыт, куорат социальнай суолталаах эбийиэктэрин элэктэриичэстибэ киирэр тэриллэрин үлэлэттибит. Бүгүн тахсыбыт дьиэктэри суох оҥорууга 50 киһилээх 5 сулууспаттан 13 энергетик биригээдэтэ үлэлиир. Бары туһанааччылар элэктэриичэстибэлэрин үлэлэрэ чөлүгэр түһүөр диэри үлэ салҕаныаҕа», - диэн КЭ ыстаансыйа тойоно Алексей Березовскай этэр.
